Yuri Kim sqaron Edi Ramën: Nuk pastrohen listat se tha një Ambasador por…

Pas apelit të Ambasadores së SHBA në Tiranë, Yuri Kim, Kryeministri Edi Rama tha dje se nuk e kupton e si 30 vjet pasi kemi zgjedhur një sistem të përgjegjësisë individuale para ligjit t’i kërkohet partive politike dhe kryetarëve të partive të mbajnë përgjegjësi pse njëri apo tjetri ka gënjyer! Meqë nuk e kuptoi, nuk vonoi shumë dhe sqarimi i Amabsadores amerikane:

“Kryetarët e partive nuk duhet t’i pastrojnë listat e tyre thjesht sepse kështu tha ndonjë ambasador apo sepse Shtetet e Bashkuara e kanë bërë të qartë që korrupsioni është përparësi,” tha Ambasadorja amerikane përmes rrjetit social duke përfunduar:

“Duhet ta bëjnë sepse e kërkon ligji shqiptar, është e pritshme nga një aleat i NATO-s dhe aspirues për në BE, dhe është shenjë bazë e respektit për votuesit.”

Ndryshe, pas apelit të Ambasadores së SHBA në Tiranë, Yuri Kim, për të larguar kriminelët nga listat zgjedhore, Kryeministri iu përgjigj me një arrogancë jo të panjohur për individin Edi Rama, duke u shprehur se nuk ka nevojë ti thotë ambasadorja amerikane detyrën e tij , e gazetarët i luti që të mos i nxjerrin përpara ambasadoren amerikane se ka thënë kështu apo ashtu, ndërsa e bëri të qartë se Ligji i Dekriminalizimit shkel të drejtat e njeriut, arsye kjo që asnjë parti nuk e ka çuar në Gjykatë Kushtetuese.