Kurti: Nuk do të bëjmë koalicione pas 14 Shkurtit; Hoxhaj: Do votohet modeli i PDK-së!

Kryetari i Lëvizjes Vetëvendosje, Albin Kurti, nga Shtimja e bëri të qartë sot se nuk do të bëjnë koalicione pas zgjedhjeve të 14 shkurtit, pasi siç tha ai, e kanë bërë para zgjedhjeve me Vjosa Osmanin.

Albin Kurti tha se fitore më 14 shkurt do ta konsiderojnë fitoren me 61 e më shumë mandate ndërsa Vjosa Osmani tha se ata që kanë menduar për xhepat e tyre, duhet të shkojnë në opozitë të gjatë.

“Numri 127 është numri i fitores, por kësaj radhe fitorja nuk është vetëm të dalim të parët se dihet që dalim ne të parët se nuk ka kush del i pari. Fitorja është 61 deputetë e më shumë, na duhet shumicë parlamentare se nuk do të bëjmë koalicione pas zgjedhjeve, ato i kemi bërë para zgjedhjeve, Vjosa Osmani dhe unë. Nuk do të qeverisim për të ju sunduar, nuk do të qeverisim për t’u pasuruar, edhe zonja Osmani edhe unë do të mbetemi siç jemi klasë e mesme, për t’u pasuruar është biznesi,” tha Ish-Kryeministri Kurti ndërsa U.D.Presidentja e Kosovës, Vjosa Osmani tha se Kosova ka nevojë Kosova të nga njerëz të pa korruptueshëm.

“Faleminderit që po ua dëshmoni atyre që e ndalën qeverinë e shpresës që nuk ka forcë që mund t’ju ndalë më. Falemnderit që po e dëshmoni që kurrë më nuk do të t’i lejoni që t’iu mashtrojnë. Ne i kemi bashkuar forcat me Lëvizjen Vetëvendosje, me kryeministrin tonë të ardhshëm. Më shumë se për çdo gjë tjetër Kosova ka nevojë t’i luftojë ata që e katandisën shpresën tuaj, që e shkelën çdo perspektivë për rininë tonë, e ata që menduan për xhepat e vet e asnjëherë për juve. Ata duhet të shkojnë në opozitë të gjatë sepse kanë nevojë edhe ata vet, por më së shumti ka nevojë Kosova që të udhëhiqet nga njerëz të pastër para ligjit, nga njerëz të pa korruptueshëm,” tha Vjosa Osmani në Shtime, ku Albin Kurti u zotua që së bashku nuk do të zmbrapsen para asnjë krimineli të fuqishëm në Kosovë:

“Por, çdo kriminel, sado i fuqishëm, do të zmbrapset para drejtësisë së shtetit dhe fuqisë së ligjit.” 

Hoxhaj: Më 14 Shkurt do të votohet modeli i PDK-së

Kryetari i Partisë Demokratike të Kosovës dhe kandidati për kryeministër, Enver Hoxhaj, ka mbajtur tubim elektoral në Prizren ku ka prezantuar Planin e PDK-së për Rimëkëmbje.

Hoxhaj ka theksuar se në zgjedhjet e 14 shkurtit ka dy modele, ai i PDK-së që nënkupton rimëkëmbje për shtetin dhe qeverisje me qytetarët, si dhe ai i Vetëvendosjes që është model autoritar që kërcënon e fyen qytetarët.

“Në këto zgjedhje ka dy modele, një model është rimëkëmbja e cila është aleancë politike e PDK-së me qytetarët dhe një model tjetër i cili është i LVV-së i cili është model autoritar, i cili është një model i shamiave të kuqe që janë simbole të sistemit totalitar, i cili është model i keqqeverisjes në nivel lokal dhe ju në Prizren e dini që Mytaher Haskuka nuk ka qenë në gjendje për tri katër vitet e fundit as bërllogun me e hjek prej rrugës se le me qeverisë”, ka thënë ai.

Hoxhaj duke thënë se PDK-ja është e vetmja parti që garon me program të qartë politik, premtoi rimëkëmbje për ekonomi, shëndetësi, arsim dhe politikë të jashtme.

“Ne në këto zgjedhje garojmë me një program të qartë politik dhe programi jonë nënkupton rritje të pagës mesatare për të gjithë ata të cilët janë në sektorin privat në 300 euro. Mbështetje masive për sektorin privat për ndërmarrjet e vogla, për ndërmarrjet e mesme, për ndërmarrjet e mëdha. Ne në këto zgjedhje garojmë për ta përmirësuar gjendjen në shëndetësi dhe kemi plan të qartë se çka do të bëjmë në sektorin e shëndetësisë duke e sjell vaksinën në Kosovë. Ne në këto zgjedhje garojmë se si do ta normalizojmë mësimin në shkolla fillore dhe në shkolla të mesme të Kosovës për shkak të pandemisë,” tha Hoxja duke përfunduar:

“Ne në këto zgjedhje garojmë që ta përmbyllim shtetndërtimin e Kosovës dhe ju e keni pa që letra e presidentit Biden dërguar në Serbi është dëshmia më e mirë se si PDK ka qenë në anën e drejtë të historisë.”

Hoti: Gjatë këtij viti do të përmbyllet liberalizimi i vizave dhe njohja nga Serbia

Ndonëse nuk mund të premtohet sepse nuk varet nga asnjë parti politike në Kosovë, kandidati i Lidhjes Demokratike të Kosovës për kryeministër, Avdullah Hoti, ashtu si partia e tij, i paskrupullt, nga Gjakova premtoi se me qeverisjen e LDK-së, gjatë këtij viti do të përmbyllet procesi i liberalizimit të vizave dhe njohja reciproke nga Serbia, ashtu siç ka kërkuar Presidenti amerikan, Joe Biden. 

“Vendet e BE-së i besojnë qeverisjes së LDK-së si pjesë e Partive Popullore Evropiane. Ne kemi përkrahjen e partive simotra për të përmbyllur me sukses procesin e liberalizimit të vizave gjatë këtij viti. Ne gjithashtu kemi përkrahjen e Shteteve të Bashkuara të Amerikës për të përmbyllur procesin e dialogut me Serbinë, siç tha Presidenti Biden ‘me njohje recirpoke,” tha kryeministri Hoti dhe duke harruar se çfarë ka nënshkruar sot tha se Kosova do të përfitojë 1 miliard euro investime

“Si rezultat i Marrëveshjes së Washingtonit që kam nënshkruar me presidentin Trump, Kosova do të përfitojë fonde në vlerë prej 1 miliard euro investime.  Do ta realizojmë ëndrrën shekullore për lidhjen hekurudhore Prishtinë-Durrës. Në programin tonë do t’i kushtohet rëndësi përafrimit të legjislacionit kulturor, si dhe strategjisë për zhvillimin e kulturës në Kosovë, me ato të vendeve anëtare të Bashkimit Evropian,” tha kandidati i LDK-së për Kryeministër ndërsa renditi disa projekte lokale që edhe pse janë punë e pushtetit lokal që drejtohet nga AAK, Avdullah Hoti i mori përsipër se i ka realizuar.  

Haardinaj: Zhvillimi i vendit dhe mirëqenia e qytetarëve, detyrat e mia 

Kryetari i AAK-së, Ramush Haradinaj, duke kërkuar mbështetjen e qytetarëve në Rahovec tha se zhvillimin i vendit dhe mirëqenia janë detyrat e tij.

“Sigurimi i ekuilibrit të pushteteve, mbështetja e qeverisë në reforma të rëndësishme për zhvillimin e përgjithshëm dhe mirëqenien e qytetarëve do të jetë detyrë e imja që do e kryej me përgjegjësi e përkushtim të plotë si President i ardhshëm i Kosovës.” tha Haradinaj ndërkohë ishte edhe në Therandë.

Limaj: Kosova në një udhëkryq të madh

Kryetari i Nismes Socialdemokrate, Fatmir Limaj, tha nga Gjakova se Kosova ndodhet në një udhëkryq të madh, e kapluar me lloj-lloj ofertash ndërkohë zgjedhjet janë momente kritike për t’ia dhënë Kosovës drejtimin për 100 vitet e ardhshme.

“Fushata elektorale nuk është një garë, një ndeshje futbolli. Është më tepër se kaq. Më 14 shkurt ka një garë tjetër se kujt do ja besoni përfaqësimin e tyre në Parlament. Qytetarët e Kosovës dhe të Dukagjinit duhet të kenë sigurinë e këtij shteti. Gjithë Dukagjini e Kosova presin që të zbardhet fati i të pagjeturve. Ata që janë lodhur për 20 vjet duhet të vijnë në Gjakovë për të parë se Gjakova ka ende plagë që nuk janë shëruar ende,” tha Fatmir Limaj duke i bërë thirrje gjakovarëve që t’i votojnë përfaqësuesit e tyre, pasi ata ndajnë dhimbje dhe vuajtje me qytetarët e këtij qyteti.