Athina në karantinë, Kryeministri grek: Duhet të parandalojmë rrezikun!

Rritja e numrit të infektimeve dhe qarkullimi i varianteve të reja të COVID-19, kanë detyruar autoritetet greke që të vendosin një pjesë të vendit në lockdown. Kryeministri i Greqisë, Kyriakos Mitsotakis, tha se rreziku po rishfaqet dhe vetë ai i mori përgjegjësinë për masat shtesë për mbrojtjen e shëndetit publik.

“Sot, megjithatë, rreziku po rishfaqet. Ne e dimë që nga Prilli do të jemi shumë më mirë. Por tani duhet të parandalojmë rrezikun! Bazuar në të dhënat e reja, unë marr përgjegjësinë për masat shtesë për mbrojtjen e shëndetit publik. Kështu, nga pasnesër, e Enjte, deri më 28 Shkurt, do të ketë masa shtrënguese të shtuara në Athinë. Kjo do të thotë që mbyllen të gjitha format e shitjes me pakicë dhe tani e tutje të gjitha nivelet e arsimit do të funksionojnë në distancë . Përveç trajtimit të veçantë që do të vazhdojë me praninë fizike,” tha kryeministri grek Mitsotakis duek saktësuar se masat e reja do të specifikohen nesër nga ata që janë përgjegjës.

Ndërkohë, autoritetet kanë vendosur që lockdown-i të nis nesër nga ora 06:00 deri në 28 shkurt.

Po ashtu, mbyllen sërish në Athinë dhe zonën e gjerë të Atikës shkollat fillore dhe të mesme, të gjitha kompanitë dhe dyqanet, përveç supermarketeve, njësitë ushqimore, farmacitë.

Qarkullimi do lejohet vetëm për arsye madhore, me mesazh sms nga celulari për 6 lëvizje të caktuara, vizitë mjekësore, blerje ushqimesh, takime urgjente në sektorin publik, ndihmë urgjente ndaj njerëzve në nevojë, ceremoni mortore të familjarëve më të afërt dhe shëtitje me kafshët shtëpiake.