Lehtësohen masat Anticovid në Kosovë

Pas rekomandimit të IKSHPK dhe Bordit këshillëdhënës dhe propozimit të Ministrisë së Shëndetësisë, Qeveria në detyrë e Kosovës ka lehtësuar masat Anticovid duke hequr dhe orën policore.

“Hiqet ora policore nga zonat e kuqe, operatorët ekonomikë do të punojnë deri në orën 22:00 dhe studentët i kthehen ligjëratave në fakultet, duke u hequr kështu opsioni online,” tha zëdhënësja e Qeverisë në detyrë, Antigona Baxhaku

Masat e reja parashikojnë që qytetarët e huaj që hyjnë në Kosovë, e që vijnë nga vendet me risk të lartë sipas listës zyrtare të ECDC-së, duhet të kenë test RT-PCR negativ për COVID-19 të bërë në 72 orët e fundit në bazë të parimit të reciprocitetit.

Gjithashtu ka ndryshuar dhe numri i personave që mund të qëndrojnë në hapësira të mbyllura.

“Në hapësira të mbyllura ndalohet grumbullimi i qytetarëve në numër prej më shumë se 50 personave, ndërsa në sheshe publike, parqe, vende publike, qendra rekreative dimërore dhe të ngjashme, lejohet grumbullimi deri në 80 persona me përjashtim rasteve të lejuara me këtë vendim,” thuhet në Vendim ndërkohë bazuar në nivelin e riskut Komunat do të vazhdojnë të jenë të kategorizuara në të gjelbër, verdhë e të kuqe.