Dita e Pavarësisë së Kosovës, Joe Biden uron U.D.Presidenten Vjosa Osmani
Presidenti i Shteteve të Bashkuara, Joe Biden, i ka dërguar një letër urimi U.D. Presidentes Vjosa Osmani për 13- vjetorin e pavarësisë së Kosovës.
“Populli amerikan i bashkohet urimeve të mija për ju dhe miqtë tanë në Kosovë në 13-vjetorin e pavarësisë së vendit tuaj,” thekson Joe Biden duke siguruar se Shtetet e Bashkuara mbeten partner dhe mik i përkushtuar i Kosovës.
“Ne mezi po presim që të punojmë me Qeverinë e ardhshme për ta çuar Kosovën përpara në rrugën e saj evropiane. Ka shumë punë për të bërë, përfshirë marrëveshjen gjithëpërfshirëse të normalizimit të marrëdhënieve me Serbinë që në qendër e ka njohjen e ndërsjellë, me të cilën forcohet sundimi i ligjit, përballimi i pandemisë globale COVID-19 dhe nxitja e rritjes ekonomike që mundëson një të ardhme të prosperuar për të gjithë qytetarët e Kosovës,” thuhet në urimin e Presidentit të SHBA, Joe Biden, drejtuar Presidentes Vjosa Osmane e cila përjetësisht shprehet mirënjohëse për mbështetjen e pazëvendësueshme të Shteteve të Bashkuara të Amerikës.
Ndryshe, U.D. Presidentja Vjosa Osmani ka pranuar letër urimi për 13-vjetorin e pavarësisë së Kosovës edhe nga Mbretëresha Elizabeth II e Mbretërisë së Bashkuar, presidenti gjerman Frank- Walter Steinmeier, presidenti francez Emmanuel Macron dhe ai italian Sergio Mattarella.
