Kërkojmë vetëm vëmendjen që meritojmë!

nga Nebil Çika*

Në shumë raste kur ne kërkojmë nga PD të përfshijë në programin e sajë plotësimin e të drejtave dhe interesave të të përndjekurve politikë antikomunistë, disa nga ne, ose të painformuar ose provokatorë, reagojnë negativisht me komentet e tyre në rrjetet sociale.

Dua të sqaroj se qëllimi ynë nuk është të dëmtojmë PD por ta ndihmojmë atë të marrë gjithë mbështetjen e mundshme të të përndjekurve politikë antikomunistë dhe njerëzve tanë në zgjedhjet e 25 prillit.

Ne jemi themeli i sajë, arsyeja e krijimit dhe faktori kryesor i ekzistencës së sajë.

Por kjo nuk mund të realizohet nëse PD nuk do të ketë vëmendjen e duhur ndaj shtresës sonë që është edhe baza politike e elektorale e PD-së.

Ne kemi marrë premtime në mënyrë informale që do të kemi vëmendjen e duhur nga PD, por nga publikimi i programit dhe retorika politike e drejtuesve të sajë, deri tani, nuk kemi parë e dëgjuar gjë konkrete.

Ne kërkojmë që në programin politik e elektoral të PD të trajtohen problemet tona te pa zgjidhura, si:

-Gjetja e eshtrave të të zhdukurve nga diktatura komuniste.

-Dekomunistizimi i vendit, spastrimi i administratës shtetërore nga autorë të krimeve të komunizmit.

-Ndryshimin e ligjit për statusin e të përndjekurve politikë pasi në ligjin aktual mijëra të pushkatuar, të burgosur e të internuar nuk e përfitojnë për shkak të pengesave të ligjit dhe akteve normative të qeverisë aktuale.

-Dëmshpërblimi i të përndjekurve politikë, zbatimi i të cilit zvarritet që nga viti 2009.

-Zbatimi i ligjit për pensionet e të burgosurve politikë që kanë bërë punë të detyruar në burgjet minierë.

-Përfaqësimi politik i të përndjekurve në zgjedhje me kandidatura që vijnë nga shtresa jonë etj.

-Kthimi dhe kompensimi i drejtë i pronave, pasi shtresa jonë janë në 90 %  të rasteve edhe pronarë legjitim.

Kur ne i kërkojmë PD-së të vëmendje të cilësuar për ne kemi parasysh të gjithë të përndjekurit politikë antikomunistë të Shqipërisë, rreth 35% të popullsisë, që janë shumë më shumë se sa ata që e kanë mundësinë të bëjnë karrierë politike apo të jenë pjesë e qeverisjes së PD.

Sqarojmë PD dhe krejt opinionin publik se e vetmja shoqatë aktive e legjitime e rreshtuar historikisht në krahun e sajë jemi ne: “Shoqata Antikomuniste e të Përndjekurve Politikë të Shqipërisë “. Çdo përpjekje për të fragmentuar të përndjekurit politikë antikomunistë duke faktorizuar shoqata fantazma që nuk kanë lidhje me ne është në dem të sajë, pasi të përndjekurit kanë zgjedhur vetë përfaqësuesit e tyre.

Kërkojmë nga zoti Basha një marrëdhënie me të përndjekurit politikë antikomunistë jo me bashkimet profesionale të Enver Hoxhës dhe bashkëpunëtorët e Sigurimit të Shtetit që bredhin rrugëve me nga një vulë në çorape duke pretenduar se janë përfaqësues të të përndjekurve politikë.

Besoj se zoti Basha dhe PD e kanë informacionin dhe vullnetin e duhur politik të orientohet drejtë e me efikasitet politik e elektoral në marrëdhëniet me ne, duke korrigjuar gabimet e të shkuarës.

Për të realizuar këtë, PD duhet së pari të na dëgjojë dhe veçanërisht të na mirëkuptojë!

*Kryetar i Shoqatës Antikomuniste të Përndjekurve Politikë të Shqipërisë