Pas takimit me Bashën, Mediu: PR do kontribuoj të marrë vota në Kukës e Dibër

Kryetari i Partisë Republikane, Fatmir Mediu, pas takimit që zhvilloi me kreun e Partinë Demokratike, Lulzim Basha, tha se me rëndësi është të maksimalizohen votat e opozitës ndërsa PR do jetë kontributore për të marrë vota edhe në Kukës e Dibër, ku ka pretendime që të kontribuojë për koalicionin.

“Unë besoj se koalicioni do të funksionojë jo vetëm për liderët e partive. janë të rëndësishme votat e PR dhe të partive të tjera, ka rëndësi edhe vota. Mund të bëni vetë kalkulimet sa i takojnë PR-së, PD-së etj. PR do jetë kontributore për të marrë vota edhe në Kukës, në Dibër, ku ka pretendime që të kontribuojë për koalicionin,” u shpreh Fatmir Mediu duke përfunduar:

“Programi i PD si program i opozitës është i plotë, duhet të jetë i të gjitha forcave politike, por ka specifika çdo parti.   PD të reflektojë për pronarët e ligjshëm. Ne do i shërbejmë përherë interesit kombëtar.”

Marrëveshja me Partinë Republikane të Fatmir Mediut vjen pas marrëveshjeve me Agron Dukën e PAA i cili do të garojë në Durrës, Nard Ndokën e PDK në Shkodër dhe Dashamir Shehit të LZHK në Tiranë.

Ndërkohë që kanë mbetur edhe gjashtë ditë nga afati për regjistrimin e koalicioneve në KQZ, Kryetari i PD, Lulzim Basha u takua edhe me Shpëtim Idrizin e PDIU, dhe ndonëse nuk ka arritur ende një marrëveshje, në parim janë dakord për të shkuar me një listë të përbashkët; Pritet të përcaktohet numri i përfaqësuesve të partive të vogla që do futen në listat e PD dhe qarqet.

Ndryshe, 6 marsi është afati i fundit kur partitë politike duhet të dorëzojnë listën e kandidatëve për deputetë.