Rüttershoff: PD ka njerëzit dhe programin e duhur; Bardhi: Fushatë e bazuar tek rinia, jo tek bandat!
Në një takim me të rinjtë e PD në Elbasan, të angazhuar në aksionin derë më derë, të cilët u trajnuan nga Fondacioni Konrad Adenauer, Drejtuesi Politik, Gazment Bardhi u shpreh se ai e ka bazuar fushatën pikërisht tek rinia.
“Do të mbështetem tek rinia, sepse besoj tek energjia e tyre dhe motivi që kanë për t’u përfshirë në politikë për të ndryshuar vendin, dhe jo për të përfituar,” tha Drejtuesi Politik i PD për Elbasanin, Gazment Bardhi.
Ndërkohë Drejtori i zyrës së Fondacionit Konrad Adenauer për Shqipërinë, Tobias Rüttershoff, tha me këtë rast se Partia Demokratike ka programin e duhur për ta futur vendin në rrugën europiane, dhe po ashtu ka njerëzit e duhur, siç është Gazment Bardhi.
Ndryshe, ky takim u organizua në Elbasan nga Qendra Shqiptare Për Qeverisje të Mirë, në bashkëpunim me Fondacionin Konrad Adenauer, që është një prej zyrave partnere të Partisë Demokratike në hartimin e programit politik dhe një mbështetëse për fushatën zgjedhore.
