12 të arrestuar dhe 400 mijë euro të sekuestruara në Ministrinë e Bujqësisë!

12 persona janë arrestuar ndërsa janë sekuestruar rreth 400 mijë euro në aksionin e sotëm nga Policia e Kosovës në Ministrinë e Bujqësisë. Me përfundimin e aksionit, Kryeprokurori i Kosovës, Aleksandër Lumezi, duke dhënë detaje mbi aksionin dhe personat e arrestuar që dyshohen për keqpërdorim të subvencioneve, detyrës zyrtare dhe marrje e dhënie ryshfeti, tha se nga muaji janar ka filluar grumbullimi i informacioneve dhe provave.

“Sot kemi bërë bastisjen e tyre, ku e kemi arsyetuar kërkesën për bastisje dhe gjatë këtyre veprimeve kemi konfiskuar një shumë të madhe të parave, laptop, telefona, vetura. Janë arrestuar 12 persona, 10 janë persona zyrtarë dhe 2 qytetarë të tjerë që kanë ndihmuar. Dyshohen për keqpërdorim të subvencioneve, marrje dhe dhënie të ryshfetit,” tha Lumezi duke shtuar se në bazë të provave dhe informatave ky aksion do të zhvillohet edhe në ditët e ardhshme pa specifikuar lokacionet.

Ndërsa Drejtori i Krimeve Ekonomike dhe Korrupsionit, Nazmi Sahiti, tha se në aksionin e sotëm janë rreth 400 mijë euro që janë sekuestruar.

Bastisja është zhvilluar në Agjencinë për Zhvillim të Bujqësisë dhe në komunën e Istogut Lipjan dhe në Pejë.

Policia e Kosovës, përkatësisht Departamenti i Krimeve të Rënda ka bërë të ditur se të arrestuarit deri më tani janë: H.M, K.Z, A.N, S.SH, L.S, S.S, D,A, B.N, P.K, SH.K, A.U, K.S.           

Gjatë bastisjes janë konfiskuar disa dokumente, dy çanta me para dhe tri armë.

Njëri nga të arrestuarit në Ministrinë e Bujqësisë është edhe Luan Statovci i cili në të kaluarën ka qenë i akuzuar për keqpërdorim të detyrës zyrtare, por që më pas ishte shpallur i pafajshëm.

Në mesin e të arrestuarave është edhe një ish-gazetare, tani zyrtare e Ministrisë së Bujqësisë. Bëhet fjalë për Kastriote Bajrami-Sejdiu, e cila qe një kohë është pjesë e stafit të kësaj ministrie.

Ndërkohë, mediat kanë identifikuar edhe personat e arrestuar:

-Hasan Maxharaj

-Kushtrim Zogaj

-Agim Nuha

-Sadat Shkodra

-Luan Statovci

-Salih Statovci

-Dritan Alaj

-Berat Nika

-Pajtim Krasniqi

-Shpejtim Krasniqi

-Adushe Ukshini

-Kastriote Bajrami Sejdiu