Thaçi-Vuçiç, të dielën në raundin e ri të bisedimeve në Bruksel

Presidenti i Kosovës, Hashim Thaçi dhe homologu i tij serb, Aleksandar Vuçiç do të takohen të dielën më 24 qershor në raundin e ri të bisedimeve në Bruksel, bënë të ditur Agjencia serbe shtetërore e lajmeve “Tanjug” duke ju referuar burimeve diplomatike evropiane.

Dy presidentët, sipas departamentit evropian për politikë të jashtme, duhet të bisedojnë kryesisht për arritjen e marrëveshjes gjithpërfshirëse për normalizimin e marrëdhënieve, ndërsa zbatimi i marrëveshjeve të arritura do të jetë në plan të dytë të agjendës, raporton Tanjug.

Para këtij takimi të presidentëve, të premtën dhe të shtunën pritet të zhvillohet edhe një raund i bisedimeve teknike të delegacioneve të Kosovës dhe Serbisë.

Dialogu i nivelit të lartë politik në mes të presidentit të Kosovës, Hashim Thaçi dhe atij serb Aleksandar Vuçiç, për herë të fundit është zhvilluar më 23 mars në Bruksel. Edhe në këtë takim është biseduar për marrëveshjen gjithpërfshirëse, por presidenti i Serbisë ka insistuar që të diskutohet për formimin e Asociacionit të komunave serbe.