Në 1991 erdhën dhjetëra mijëra, Di Maio: Sot në Itali janë 500.000 shqiptarë dhe japin kontribut të jashtëzakonshëm
Duke kujtuar nga Bari mbërritjen e dhjetëra anijeve me shqiptarë 30 vite më parë dhe pritjen nga populli italian, Ministri i Jashtëm i Italisë, Luigi Di Maio, duke u ndjerë krenarë sot foli për imazhet e mijëra personave në anijet e fatit që puljezët dhe të gjithë italianët i ruajnë në memorie nga viti 1991 dhe faktin se sot në Itali jetojnë 500 mijë shqiptarë dhe japin një kontribut të jashtëzakonshëm në shoqërinë italiane.
“Nuk e dimë me saktësi se sa shqiptarë mbërritën në brigjet puljeze ata muaj dramatikë të vitit 1991, sigurisht disa dhjetëra mijëra. Vetëm anija “Vlora” që u ankorua në portin e Barit në gushtin e 1991 transportonte 20 mijë persona. Të gjithë ata ashtu sikurse mijëra bashkatdhetarët e tjerë që erdhën në muajt e mëpasshëm gjetën mikpritje. Pritja e shqiptarëve nga qytetarët puljezë ishte e jashtëzakonshme dhe ende sot na mbush me krenari,” tha shefi i diplomacisë italiane, Di Maio, në një konferencë të përbashkët për mediat, me kryeministrin Edi Rama dhe Presidentin e Rajonit të Pulias, Michele Emiliano, duke shtuar se qytetarët shqiptarë që jetojnë në Itali, janë sot rreth 500 mijë dhe japin një kontribut të jashtëzakonshëm në të gjithë sektorët.
“Për këtë arsye jam sot këtu me Edi Ramën, mik i sinqertë i Italisë dhe me presidentin e rajonit të Puglias për të kujtuar ato momente aq domethënëse dhe prekëse që kanë kontribuar për të bashkuar dhe më shumë popujt tanë duke na shtyrë të mendojmë dhe për të ardhmen.
Pikërisht mbi këtë kornizë nisi afrimi i vazhdueshëm i Shqipërisë në Europë, Një afrim që Italia dhe unë personalisht e kemi mbështetur dhe inkurajuar. Dëshira është që negociatat e pranimit të Shqipërisë në BE të mund të hapen më në fund këtë vit,” tha Luigi Di Maio, duke folur për raportet unike që tashmë janë ndërtuar në të gjitha këndvështrimet ekonomike, kulturore dhe sociale.
“Roli i Italisë në Shqipëri është padyshim special. Ambasada jonë koordinon një prezencë të gjerë në Shqipëri. Pavarësisht se 2020 ishte një vit veçanërisht i vështirë Italia është konfirmuar si partneri i parë i Shqipërisë me 31.4% të shkëmbimeve tregtare, të barabartë me rreth 2.2 miliardë euro, mendoni rreth 20% të PBB shqiptar,” tha Ministri i Jashtëm i Italisë, Luigi Di Maio, duke siguruar se rrugëtimi ynë i bashkëpunimit dhe miqësisë vazhdon me hapa konkretë dhe Italia mbështet bindshëm Shqipërinë dhe për këtë besojmë që Europa duhet të tregohet në lartësinë e aspiratave të shqiptarëve.
