Koncesioni i Aeroportit Rinasit, Parlamenti rrëzon Dekretin e Presidentit

Me 84 vota për Parlamenti ka rrëzuar Dekretin e Presidentit të Republikës, Ilir Meta, për zgjatjen e afatit të koncesionit të Aeroportit “Nënë Tereza”.

Rrëzimin e Dekretit e paralajmëroi Ministrja e Energjisë dhe Infrastrukturës, Belinda Balluku, e cila në fjalen e saj në parlament tha se pretendimet e kreut të shtetit lidhur me kohën e negocimit nuk qëndrojnë, ndërsa hodhi poshtë po ashtu akuzat për ndryshim të aksionerit.

“Ndryshimi i aksionerëve nuk përbën ndryshimin e shoqërisë. Shteti përmes këtij rinegocimi ka arritur të imponohet te koncesionari për shtimin e investimeve deri në 99 milionë euro, që do të konsistojnë si në rritjen e cilësisë së shërbimeve, si në rritjen e kategorisë nga 4C në 4E, me zgjatimin e pistës dhe përmbushjen e kushteve të sigurisë”, tha Balluku.

Ditë më parë, Presidenti i Republikës, Ilir  Meta, duke kthyer në Parlament zgjatjen e koncesionit për Aeroportin “Nënë Tereza” tha se marrëveshja që zgjat këtë afat është antikushtetues dhe ka nivelin më të lartë të korrupsionit legjislativ.

“Ky ligj dhe marrëveshja shtesë koncesionare ka nivelin më të lartë të antikushtetuesmërisë, por edhe të korrupsionit legjislativ në qeverinë dhe në kuvendin tonë një partiak. Shtesa arbitrare është kryer në kundërshtim me rregullat.  Kjo kontratë shtesë koncesionare është mbajtur larg syrit të publikut,” tha Presidenti Meta në arsyetimin e tij duke përfunduar:

“Në faqen zyrtare të Kuvendit nuk është bërë ende publike. Arsyeja është e thjeshtë fshehja nga sytë e publikut të kësaj procedure krejtësisht antikushtetuese, skandaloze dhe ligjore.”