Manipuloi votat më 14 Shkurt, arrestohet Kryetari i Komunës

Është arrestuar Kryetari i Komunës Kllokot, Bozhidar Dejanoviç dhe Drejtori i Urbanizmit të kësaj komune. Arrestimi u bë nga policia me urdhër të Prokurorisë Speciale me dyshimin e manipulimit të votave në zgjedhjet e 14 Shkurtit.

Zëdhënësi i Prokurorisë së Kosovës, Ekrem Lutfiu, tha përmes një deklarate se urdhri për arrestim ka ardhur nga gjyqtari i procedurës paraprake, duke përfshirë edhe kërkesën për kontrollimin e objekteve të Komunës së Kllokotit.

Ndërkohë Policia e Kosovës duke konfirmuar arrestimin shprehet:

“Mund të konfirmojmë se, në bazë të kërkesës së Prokurorisë dhe urdhëresës së Gjykatës kompetente, Policia e Kosovës është duke e realizuar një operacion policor. Ky operacion i cili është duke u realizuar në bashkëpunim me Prokurorinë, ndërlidhet me procesin zgjedhor.”

Ndryshe, gjithçka ndodhi pas ndërhyrjes së Beogradit zyrtar në procesin zgjedhor të 14 Shkurtit duke deformuar rezultatin me Adrijana Hoxhiçin e cila themeloi “Iniciativa Qytetare Komuniti i Bashkuar – Adrijana Hoxhiç”. Me ndërhyrjen e Presidentit të Serbisë, Aleksandar Vuçiç, partia e Hoxhiçit mori 6.422 vota apo një ulëse në Parlamentin e Kosovës.

Pas shpalljes së rezultateve përfundimtare dhe ankesës së partive boshnjake, Paneli Zgjedhor për Ankesa dhe Parashtresa, PZAP, i anuloi partisë së Hoxhiçit 4.205 fletëvotime me arsyetimin se numri i votave për partitë boshnjake u rrit me 49 për qind; Dhe, kishim të bëjmë me vota që vinin nga mjedise ku nuk jetojnë fare boshnjakë, madje janë etnikisht të pastra me serbë.

Adrijana Hoxhiç e apeloi vendimin e PZAP në Gjykatën Supreme, e cila pritet sot të shpall vendimin.