Me Kurtin, Kosnett: Të përkushtuar për ta ndihmuar qeverinë e re!

Ambasadori amerikan në Kosovë, Philip Kosnett, tha sot pas takimit me kryetarin e Lëvizjes Vetëvendosje, Albin Kurti, se Shtetet e Bashkuara janë të përkushtuara për t’i ndihmuar qeverisë së re që të ketë sukses dhe të jetë e barabartë në Evropë dhe bashkësinë ndërkombëtare.

“Ne mbesim të përkushtuar për ta ndihmuar qeverinë e re që të ketë sukses dhe të përparojë si një partner i barabartë në Evropë dhe me bashkësinë ndërkombëtare,” shprehet Kosnett përmes rrjetit social Twitter duke sqaruar se takimi është pjesë e diskutimeve që është duke zhvilluar për prioritetet e përbashkëta të Shteteve të Bashkuara dhe Kosovës.

Ndryshe, pas certifikimit të rezultatit të zgjedhjeve të 14 Shkurtit, seanca konstituive e legjislaturës së tetë të Parlamentit të Kosovës pritet të zhvillohet më 22 mars ku pritet që 120 deputetët e rinj të bëjnë betimin dhe të zgjedhin kryetarin dhe pesë nënkryetarët e ri. Pas kësaj seance, fituesi i zgjedhjeve, Lëvizja Vetëvendosje me 58 ulëse parlamentare merr mandatin për formimin e qeverisë.