Atentati/ Prokuroria kërkon 1 vit burg për Tom Doshin, pritet vendimi

Prokuroria e Tiranës kërkoi sot dënimin me 1 vit burg për deputetin Tom Doshi dhe ish-deputetin Mark Frroku. Ndërkohë që për Durim Bamin u kërkua 8 muaj burg.

Pretenca është dhënë gjatë ditës së sotme në Gjykatën e Tiranës. Por për shkak të gjykimit të shkurtuar, të akuzuarve i ulet 1/3 e dënimit. Vendimi për to jepet më 4 korrik.

Tom Doshi, Mark Frroku dhe Durim Bami akuzohen për kallëzim të rremë për atentatin e supozuar ndaj deputetit të Shkodrës, për të cilin u akuzua Ilir Meta, ish-Kryetar I Parlamentit, në kohën kur u hodhën akuzat.

Dosja në fjalë qëndroi 6 muaj e bllokuar në Gjykatën e Lartë dhe më pas ka lëvizur drejt Gjykatës së Krimeve të Rënda dhe më pas sërish në Gjykatën e Lartë.

Çështja në fjalë bëri bujë në vitin 2015, kur deputeti Tom Doshi tha publikisht se kishte zbuluar një atentat që do të bëhej ndaj tij.