Greva e kontrollorëve të trafikut ajror, mbyllet Aeroporti i Rinasit

Aeroporti i Rinasit ka mbyllur dyert, teksa greva e kontrollorëve të trafikut ajror ka bërë të pamundur funksionimin normal të aeroportit të vetëm në vend.

Sipas burimeve nga aeroporti, Rinasi pritet të jetë i mbyllur deri në datën 8 prill në orën 10 të mëngjesit.  Në njoftimin e dërguar kompanive nga Autoriteti Nërkombëtar i Aviacionit Civil thuhet se Tirana International Airport është i mbyllur për të gjitha fluturimet.

Më herët , Tirana International Airport (TIA) njoftoi se aktiviteti ishte ndërprerë përkohësisht nga ora 9.23 deri në ora 09.55 për shkak të mungesës së stafit në Agjencinë e Trafikut të Kontrollit Ajror. Dy fluturime janë prekur nga ky fakt, Aegean Airline me destinacion Athinë-Tiranë dhe Air Albania me destinacion Stamboll-Tiranë, që do të ketë 40 minuta vonesë. Aegean Airline është kthyer sërish në Athinë.

Më pas, ministrja e Infrastrukturës dhe Energjisë, Belinda Balluku zhvilloi një takim me kontrollorët, por nuk u arrit asnjë marrëveshje për rikthimin e tyre në punë.

Për ditën e sotme ishin planifikuar gjithsej 13 fluturime në nisje nga Rinasi. Deri në orën 10 janë nisur 5 avionë dhe më pas fluturimet janë anuluar.

Në mbërritje ka arritur të ulet vetëm Wizz Air nga Milano në orën 10.30, ndërsa TIA në faqen e saj njofton se të gjitha mbërritjet e tjera janë anuluar.

Greva 

Kontrollorët e trafikut ajror, që varen nga Albcontrol, kompania me kapital shtetëror që menaxhon dhe kontrollon hapësirën ajrore shqiptare, po protestojnë prej disa ditësh. Protestat e tyre nisën pasi me datë 29.04.2020, nëpërmjet njoftimeve personale, Kontrolloret e Trafikut Ajror janë njoftuar se me vendimin numër 1, datë 24.04.2020 të Këshillit Mbikëqyrës së Shoqërisë Albcontrol Sh.A. është vendosur ulja e pagave të tyre dhe pezullimi i të drejtave të fituara me kontratën kolektive të punës.

“Pas një periudhe 11 mujore gjendemi në të njëjtën situatë dhe pa asnjë rrugëzgjidhje të parashikuar për të ardhmen e afërt. Situata e cila zgjat prej më shumë se 11 muajsh ka krijuar një gjendje të rrezikshme dhe nivel stresi shume te madh për kontrollorët e trafikut ajror. Rrezikshmëria lidhet me nivelin e stresit dhe lodhjes mendore e fizike që po mblidhet gradualisht mbi personat fizike të cilët ushtrojnë detyrat e kontrollorëve të trafikut ajror”, deklaronte Sindikata e Pavarur e Kontrollit të Trafikut Ajror (SPKTA), në një njoftim të pak ditëve më parë./Monitor/