A do të hapen negociatat në qershor 2019? Vlahutin: S’mund t’a them…

Një ditë pasi ministrat e Jashtëm të BE-së dhanë vendimin në lidhje me negociatat për Shqipërinë, ka reaguar edhe Ambasadorja e BE-së në Tiranë, Romana Vlahutin.

Sipas saj, Shqipëria mori tre gjera pozitive dhe se shumë shpejt do të nisë një punë voluminoze.

“Shqipëria mori tre gjëra pozitive, njohja e rekomandimit e të gjithë punës, e dyta kalendari, një datë e qartë dhe e treta Këshilli ka pranuar që Komisioni të nisë punën përgatitore me Shqipërinë. Është një punë mjaft e madhe përgatitore që do të kryhet nga ana e BE dhe Shqipërisë.

Ky është kalendari dhe do të dëgjoni më shumë për këtë nga ambasadori i ardhshëm. Mos u shqetësoni, kur të kemi detajet do i ndajmë me ju. Ne jemi të lumtur, se na jepet mundësia për të filluar lëvizjet më shpejt”, tha Vlahutin.

Por, diplomatja e BE-së nuk është në gjendje të pohojë nëse qershorin e 2019 Shqipërisë do t’i hapen negociatat.

“Nuk mund të flas për diçka një vit paraprakisht, por ky është një kalendar i qartë dhe në votën e BE tregon se ka një angazhim për këtë datë. Kalendari është shumë i qartë. Mos u shqetësoni në ditët në vijim kur të kemi detaje do t’i ndajmë me ju.

Mund t’ju them që ne jemi të lumtur, sepse na jep një mundësi të lëvizim më një ritëm më të shpejtë dhe të fillojmë përgatitjet”, u shpreh ajo.