A jep bukë KS e OKB?!
Në prag të anëtarësimit të Shqipërisë në NATO, mediat nën kontrollin e Kryetarit të Bashkisë dhe liderit të opozitës së asaj kohe, Edi Rama, përmbytën ekranet me injorantë komunistë që deklaronin se nuk na duhet anëtarësimi në Aleancën Veriatlantike sepse ajo nuk jep bukë!
Kjo injorancë shkoi edhe më larg, duke organizuar protestë Anti-NATO ku citoheshin kostot që do paguaj Shqipëria si anëtare e NATO-s dhe rreziku që i kanoset nga armiqtë e saj!
Por, kur Edi Rama u ul në fronin e Saliut, gjërat ndryshuan!
Shumë shpejtë këtij deliranti i erdhi radha të kryesoj OSBE-në, dhe Organizata për Siguri dhe Bashkëpunim Evropian na doli organizata më e rëndësishme në botë edhe pse dështoi rëndë në Shqipëri duke e bërë procesin zgjedhor për 30 vite tranzicion, jo të lirë dhe të ndershëm, por, ferr! Por, kjo nuk e pengoi kryedelirantin shqiptar të shes impenjimin për mbledhjen që do kryesonte në Vjenë, dhe angazhimin e tij për të ndërmjetësuar me Moskën.
Qytetarët shqiptarë, shumë më të uritur se në vitin 2009 kur Shqipëria u bë anëtare e NATO-s, duke shikuar Edi Ramën në krye të OSBE-së dhe me pamje nga stomaku i tyre, nuk e bënin dot lidhjen që me kohë u sugjeronte lieri i tyre global ndërsa OKB u deklaronte se janë me pamjaftueshmëri ushqimore!
Por, lideri i tyre nuk ndaloi, u tha se bukë nuk kanë por u duhet Ballkani i Hapur në mënyrë që vëllezërit e tyre serb të ushqehen dhe të shkatërrojnë blegtorinë dhe tashmë edhe bujqësinë shqiptare, vetëm e vetëm që ai të ulet në fronin e liderit të këtij organizimi kriminal!
Në fund, me përparimin e teknologjisë dhe ndryshe nga luftërat e viteve të fundit në Afganistan, Gjeorgji, Irak, Siri etj. kur me luftën në Ukrainë të gjithë e panë se OKB nuk ka kurrfarë kuptimi, aq më pak Këshilli i Sigurimit kur njëri nga anëtaret e saj, Rusia, po vret aq sa i don kokërra e qejfit dhe krijon tensione në veri të Kosovës për të përçarë Perëndimin, na del Kryeministri Edi Rama me çekiç në dorë në krye të KS OKB duke i thënë shqiptarëve se sot Shqipëria do të ulet në krye të tryezës së Këshillit të Sigurimit, për të drejtuar një nga seancat më të rëndësishme të dekadës së fundit!
A do të marrin bukë shqiptarët nga ky Këshill i Sigurimit meqë janë shumë më të uritur se në vitin 2009?!
Natyrisht që jo!
A mund të përfitoj Kosova meqë në krye të saj gjatë muajit shtator është një shqiptar, të paktën me letra?!
Natyrisht që jo!
A është ky takimi më i rëndësishëm për Ukrainën, qysh prej fillimit të pushtimit në shkallë të gjerë nga Rusia, siç pretendon Kryeministri i Shqipërisë, Edi Rama?!
Natyrisht që jo!
Shqipëtarët për ta kuptuar më mirë kryedelirantin e tyre, e jetuan tranzicionin ku dhe e kuptuan se cili është roli i OSBE-së, dhe, pse ngatërrohen në misionin e saj Siguria dhe Bashkëpunimi, vetëm një Zot e di!
Shqipëtarët e jetuan dhe kohën e luftës në Kosovë ku e kuptuan se si funksionon NATO dhe cila është forca e saj! Me këtë rast e kuptuan se si funksionon dhe Këshilli i Sigurimit kur u miratua Rezoluta 1244 e KS të OKB, kur pak rëndësi kishte kush e kryesonte këtë Këshill sepse avionët amerikanë dhe të aleatëve të saj ishin nisur ta shpëtojnë popullin shqiptar të Kosovës!
Sot, pavarësisht se çfarë thotë kryedeliranti me çekiç në dorë, shqiptarët e kanë të qartë se liri ka aty, jo ku ka KS të OKB, por, ku është NATO me shtetet anëtare të saj, sepse, thjeshtë, lirinë e garanton vetëm Aleanca Veriatlantike! Dhe, sot, Ukraina, për të cilën flet kryedeliranti, nuk ka as bukë për të ngrënë, por fillimisht e don anëtarësimin në NATO për të garantuar lirinë nga agresori rus!
A do të kenë shqiptarët bukë meqë janë të mbrojtur nga NATO?! Kjo nuk varet nëse Kryeministri Edi Rama do të vazhdoj të ulet në krye të KS të OKB në shtator dhe jo vetëm, por, a do të vazhdoj të vjedhë Qeveria që ai drejton apo jo!
