Administrata mori pjesë në Protestë! Administrata merr ryshfet, Reflektimi i Edi Ramës: Nuk janë mosmirnjohës!
Kryeministri Edi Rama nuk zhgënjeu edhe sot para Grupit Parlamentar të Partisë Socialiste ku prezantoi reflektimin e tij ndaj Protestës që po zhvillohet në Bulevard, ndërsa e pranoi se kundër tij po preton edhe Administrata, e pranoi se po kjo Administratë merr edhe ryshfet ama ata nuk janë mosmirënjohës por matësi i ri i standarteve të kësaj qeverisje!
Në fillim të fjalës së tij, Kryeministri i Taos dhe Zegjinesë e pranoi se punonjës të administratës shtetërore dhe socialistë u ngritën në protestën kundër tij, që vijon prej rreth dy muajsh; Ata që punonin në punë shteti, në darkë iu bashkoheshin qytetarëve të tjerë në Bulevard, tha ai duke konstatuar se forca thithëse e protestës ishte më e fuqishme për ta sesa figura e tij.
“Ndaj dua që tua them qe në fillim drejt e në sy atyre që protestuan ndaj kryetarit të bashkisë, atyre që dolën në bulevard gjatë qershorit dhe atyre që kanë protestuar me heshtje dhe zë, vetëm apo me të tjerë, kudo në Shqipëri apo jashtë, jo vetëm gjatë qershorit por qysh pas zgjedhjeve, ju nuk jeni mosmirënjohës, por matësi i ri i standardeve tona.
Ju atje në periferinë e një bashkie nuk protestuat kundër atyre që kryebashkiaku kishte bërë për ju, ju që mbushët bulevardit nuk protestuat kundër Shqipërisë që ndërtuam gjatë tre mandateve të para, dhe këtu ndaj jo pak ata votues, mbështetës e anëtarë të PS, por edhe ata që gjatë ditës ishin në punën e shtetit dhe në mbrëmje shkonin në bulevard, ata nuk dolën për të sulmuar qeverinë apo bashkuar këngës “Rama jepe dorëheqjen”.
Ata që votuan për ne në qershor, dolën dhe u bashkuan me të tjerët edhe kur protesta drejtohej kundër meje sepse forca e saj përthithëse ishte më imponuese për ta sesa figura ime. Ata të administratës dolën edhe ata me të tjerët sepse Shqipëria e re që ne kemi ndërtuar nuk jeton me hijen e së vjetrës, ku njerëzit flakeshin nga puna e shtetit pse shkonin në një takim tonin në opozitë,“ tha Edi Rama pa sqaruar se për Shqipëri që kishte ndërtuar e ka fjalën, ndërsa sot është i bindur se Bulevardi u zbraz nga Flamingot dhe kanë mbetur vetëm puplat e ditëzinjve dhe vezët e punëzinjve.
“Meqë bulevardi u zbraz nga Flamingot dhe aty mbeten vetëm puplat e ditëzinjve dhe vezët e punëzinjve, as duke u kapur thjesht më fort pas fakteve dhe duke menduar se përjetimi i popullit do të ndryshojë kur ne t’ia përsërisim faktet edhe 100 herë të tjera, as thjesht duke bërë ca lëvizje njerëzish dhe duke bindur veten se populli do të bindet kur të shohë veprën aty kur sot ai shikon atdheun e nxjerrë në shitje.
Asnjë nga këto, as të tëra bashkë nuk mjaftojnë dot për ta mbyllur dot atë hendek, dhe për ta kuptuar deri në fund atë hendek. Harrojini faktet tona dhe fokusohuni te përjetimi i njerëzve. Sepse kur midis faktit tonë dhe përjetimit të njeriut të zakonshëm, hapet një hendek i atillë, atë e ka hapur rënia e besimit se pritshmëritë e tij do të realizohen. Dhe kur besimi ka rënë, edhe fakti më kokëfortë fillon duket si gënjeshtër.“
Ndërkohë Bulevardin e Flamingove e cilësoi si prova më shembullore se shqiptarët e krahasojnë Shqipërinë jo me Bulevardin e mungesave, por me vendin e mundësive ku presin të mbërrijnë.
“Madje, sikur duan ta harrojnë edhe atë që mbajnë mend akoma, sepse na gjykojnë pa mëshirë pikërisht sepse panë atë që ndryshoi. Udhëkryqi që kam folur edhe më parë është ky. Ne e nxorëm Shqipërinë nga epoka e mungesave. Ne dhe askush tjetër. Prandaj sot përballemi me një popull që e mat Shqipërinë me pritshmëritë e veta dhe na kërkon llogari më shumë nga sa do të donim ne për gjithçka për t’u bërë.
Një popull që bezdiset kur tregojmë nga sa poshtë jemi nisur dhe sa lart do të shkojë. Ka të drejtë. Sa më i madh dhe i fortë të jesh përballë kësaj të drejte, aq më në rrezik je. Nëse nuk e kupton që është më e madhe sesa ti, qofsh edhe vetë PS apo u quajtsh Edi Rama,” tha Kryeministri dhe Kryetari i PS para Grupit Parlamentar ndërsa pranoi problemet e Administratës Shtetërore përmendi rastin e një fermeri nga Lushnja, i cili priste prej tre vitesh përgjigje nga Ministria e Bujqësisë për një investim në një tokë publike në Vlorë.
Pasi lexoi mesazhin që kishte marrë nga qytetari tha se në Bulevard kishte parë sesa e padurueshme ishte bërë për njerëzit arroganca dhe mungesa e empatisë së zyrtarëve të administratës së tij, dhe nëse dikush priti reflektim nga Mister Akuzuesi më i madh ndër shqiptar, ky ishte reflekti i Kryeministrit të Taos dhe Zegjinesë, Edi Rama:
“Në atë pasqyrën e Bulevardit të Flamengove ishin plot si ai, kur pashë se sa e padurueshme është bërë për njerëzit mungesa e empatisë së njerëzve të shtetit, arroganca e zyrtarëve pa gjak që iu flasin sikur të kenë karrigen në vend të fytyrës ndërkohë që fytyrën e kanë parkuar në vend të prapanicës. Nuk po flas fare edhe për ata që u kërkojnë edhe lekë.”
