Adriatik Llalla, nga Kryetar i ILDKPI-së drejt qelisë…

Adriatik Llalla, ish-Kryeprokuror për 5 vjet, do të përballet e Vetingun në një seancë publike në datën 16 maj. Ndërkohë ndaj tij ka nisur një hetim për fshehje të pasurisë dhe dosja ndodhet në prokurorinë e Krimeve të Rënda.

E veçanta është se prokurorja që hetoi Llallën, Donika Prela, tashmë drejton pikërisht Prokurorinë e Krimeve të Rënda dhe me shumë gjasa ish-Prokurori i Përgjithshëm mund të arrestohet. Kjo për vetë faktin se Prela kërkoi arrestimin e Llallës nga Krimet e Rënda në kohën që ishte komanduar në Prokurorinë e Durrësit dhe një javë pasi mbërriti dosja në Tiranë, ajo u komandua në krye Krimeve të Rënda.

Të paktën nga zhvillimet e fundit duket se vendimi për Llallën është çështje orësh, pasi ish-Kryeprokurori duket se ka humbur edhe mbështetjen politike.

Megjithëse në momentin e shkarkimit Llalla u mor në mbrojtje politike, pas përfshirjes së emrit të tij në listën e zezë të DASH, pati një tërheqje të mbështetësve politikë.

Suportin më të madh politik Llalla e ka pasur nga Presidenti në detyrë i Republikës, Ilir Meta, partia që ai ka drejtuar, LSI, PD, por edhe nga socialistët e Ramës.

Me pak fjalë, Llalla ishte i të gjithëve dhe askënd nuk ngacmonte, nuk i prishte gjumin, dhe jo më të mendohej se mund të hetohej apo kërkohej arrestimi për zyrtarë të niveleve të larta.

Por secili nga aktorët politikë me tërheqjen e mbështetjes e lanë kryeprokurorin në një fushë beteje ku ka përballë faktorin ndërkombëtar, veçanërisht SHBA. E nëse ai nesër do të përballet me drejtësinë apo do të arrestohet, Llalla e ka të qartë se goditja për akuzat penale, i ka prej tyre.

Referuar asaj që është raportuar, asnjëherë më parë ndaj një funksionari të lartë, sikundër është Prokurori i Republikës, nuk ka pasur një insistim të ndërkombëtarëve dhe SHBA-së për ta çuar para drejtësisë. Ndoshta presioni erdhi në rritje referuar faktit se Llalla po mbrohej politikisht nga të gjithë.

Kjo do të ishte hera e parë në të paktën 25 vitet e fundit që të jetë në prag të arrestimit një Prokuror i Përgjithshëm. Dhe ndoshta ky do të jetë peshku i parë i madh që do të bjerë në rrjetën e drejtësisë së re.

Pak javë më parë Departamenti i Shtetit përfshiu Adriatik Llallën dhe familjen e tij në listën e zezë, ndërsa arsyet mbeten ato të lidhura me korrupsionin.

Por si nisi karreiera e Adriatik Llallës nga një prokuror i thjeshtë në drejtuesin e dy prej institucioneve më të rëndësishme të kontrollit dhe hetimit në vend, ILDKP dhe Prokurorisë së Përgjithshme?

Më 9 tetor 2008, Adriatik Llalla do të votohej nga Kuvendi për të drejtuar ILDKPI-në. Më parë Llalla kishte mbajtur postet e prokurorit në Lushnje, Fier, Kavajë, Tiranë si dhe ka drejtuar një strukturë që quhej Këshilli i Prokurorisë.

Më 13 tetor 2008 ai mori zyrtarisht detyrën e kreut të ILDKPI-së, institucion që merrej me pasuritë e zyrtarëve të lartë, si dhe të zgjedhurve në të gjitha nivelet. Në 5 vitet e ushtrimit të kësaj detyre, nuk la ndonjë gjurmë, mund të ketë pasur raste sporadike të ndjekjeve penale të zyrtarëve të nivelit të ulët, subjekt i ligjit për deklarimin e pasurive, por vetëm kaq.

Në një vend normal një zyrtar që s´jep rezultate dhe së paku nuk përmbush premtimet, do të përballej me një mbyllje të karrierës.

Por jo, dukej se natyra e tij dhe mosveprimi, ishte ajo që u pëlqye më së shumti nga ambienti politik shqiptar dhe pa lënë ndonjë gjurmë, Llalla në 2013 u katapultua për të drejtuar një tjetër institucion të rëndësishëm, Prokurorinë e Përgjithshme.

Me një mandat 5 vjeçar në krye të një prej institucioneve më të rëndësishme në vend në luftën kundër krimit, korrupsionit, aferave të ndryshme, Llalla sërisht nuk la gjurmë. Në një vend si Shqipëria ku në çdo raport ndërkombëtar evidentohet krimi dhe korrupsioni, në pothuajse të gjitha nivelet, institucioni i drejtuar nga Llalla pothuajse ishte inekzistent, për të mos përdorur një shprehje tashmë të njohur “flinte mbi dosje”.

Madje institucioni që ai drejtonte nuk reagoi as kur raportet e shërbimeve sekrete përfshinin emrat e zyrtarëve të policisë në trafikun e drogës apo veprimtari të tjera të paligjshme.

Në krye të Prokurorisë, Llalla do të mbahet mend për premtimin që bënte, pothuajse në të njëjtin muaj, ndoshta edhe në një njëjtën datë, se në vjeshtë do kapen peshqit e mëdhenj, apo do të kishte proçedime penale ndaj tyre. Një deklaratë standarde e thënë për 5 vjet me rradhë, sa herë përfundonte stina e verës dhe hynte vjeshta.

Një tjetër moment është ai i përplasjes me ambasadorin amerikan në Tiranë, e cila nisi në kryeqytetin shqiptar, por përmes një letre Prokurori i Përgjithshëm i asaj kohe, e zhvendosi në Uashington. Ndoshta kjo ishte vija e kuqe që jo vetëm shkeli, por edhe e tejkaloi Adriatik Llalla.

Një letër që u nis me plot akuza, nga ato për ndërhyrje dhe tejkalim kompetencash deri te lidhjet me Soros, për Ambasadorin amerikan, duket se u kthye në dënimin e vetë Kryeprokurorit. Dhe përfshirja e emrit të tij në listën e zezë të DASH ishte dënimi që iu dha nga përtej oqeanit, dhe ndoshta një tjetër dënim mund t´i vijë nga ish-vartësit e tij, prokurorë.