Afganistan, vritet gazetari i RFE

Elyas Dayee, gazetar i Radio Free Europe, RFE, është vrarë sot në provincën afgane Helmad, si pasojë e shpërthimit të një bombe e cila ishte ngjitur në makinën e tij.

Omer Zwak, zëdhënës i guvernatorit të provincs, tha për RFE se bomba e shpërthyer në makinën e Dayee, ka lënë të vdekur gazetarin dhe ka plagosur tre persona tjerë, duke përfshirë vëllain e tij. Ende askush nuk ka marrë përgjegjësi për sulmin.

“Kolegu dhe miku im i dashur, Elyas Dayee, ka humbur jetën në një sulm terrorist këtë mëngjes”, ka thënë Sami Mahdi, shef i byrosë në Afganistan.

“Ai ka pasur gjithmonë një buzëqeshje në fytyrë. Ky është lajm i tmerrshëm”, ka thënë ai.

Elyas Dayee ka punuar për Shërbimin e Afganistanit në RFE.

Zëdhënësi i presidencës afgane, Siddiq Siddiqui, ka dënuar vrasjen e Dayees duke thënë se mbrapa sulmit qëndrojnë armiqtë e lirisë së shprehjes dhe mediave në Afganistan.

Ndryshe, dhuna në Afganistan është rritur teksa negociatorët qeveritarë dhe talibanët janë duke zhvilluar takime në Katar për të gjetur zgjidhje për luftën në Afganistan. Ende nuk është bërë asnjë pikë kthese prej kur kanë nisur bisedimet në muajin shtator./RFE/