Aksion kundër trafikut të drogës dhe pastrimit të parave, arrestohet Orest Sota, në kërkim Ilir Shtufi, Artur Shehu, Edmond Jaupi dhe Orges Birçaj

Prokuroria e Posaçme Kundër Korrupsionit dhe Krimit të Organizuar, SPAK, në bashkëpunim me Policinë e Shtetit, ka ndërmarrë sot një operacion për ekzekutimin e 20 masave të sigurisë ndaj disa personave të dyshuar për përfshirje në veprimtari kriminale. Nga këto masa janë dhënë 15 “arrest me burg: dhe 5 në ‘arrest shtëpie’.

Sipas informacioneve paraprake, të dyshuarit hetohen për veprat penale të trafikimit të lëndëve narkotike dhe pastrimit të parave në vlera të mëdha, të kryera në kuadër të një grupi të strukturuar kriminal.

Orest Sota, raporton BW, ka përfunduar në pranga, ndërsa në kërkim janë Ilir Shtufi, Artur Shehu, Edmond Jaupi dhe Orges Birçaj.

Operacioni është ende në vijim e sipër, ndaj po ushtrohen kontrolle në disa zona në Tiranë dhe Vlorë.

Sa i përket strukturës së grupit kriminal, dyshohet se krerët janë të vendosur në Dubai ndonëse masa e sigurisë “arrest me burg” është marrë si për Artur Koçekun ashtu dhe vëllanë e tij Abedin Koçeku.

Aksioni është ende në zhvillim, ndërsa pritet që autoritetet të publikojnë më shumë detaje mbi numrin e personave të përfshirë, masat e ekzekutuara dhe rezultatet e operacionit.