Aksioni i policisë në veri të Kosovës, ja armët që u konfiskuan

By Pa frike Last updated Tet 14, 2023 21

Me përfundimin e aksionit të Policisë së Kosovës në veri bëhet e ditur se janë gjetur sasi e madhe e mjeteve shpërthyese, eksploziv, zolla e kallashnikov.

Zv/Drejtori i Policisë së Kosovës për Rajonin e Veriut, Veton Elshani, konfirmoi se operacioni i sotëm i bastisjeve i cili ka filluar në orën 10:00, është një vazhdimësi e hetimeve që kanë filluar me datën 24 shtator, duke shtuar se me urdhëresë të gjykatës kompetente policët kanë ndërhytrë në shtatë lokacione në veri të Kosovës, katër lokacione në Mitrovicë Veriore, dy në Zveçan dhe një në Banjskë.

Ai konfirmoi se shumë pak Urës së Ibrit, te tre rrokaqiejt janë gjetur mjete shpërthyese, eksploziv, zolla, kallashnikov, municion të ndryshëm dhe pajisje të tjera me të cilat forenzika është duke i identifikuar.

Zv/Drejtori i Policisë bëri të ditur se ky është lokacioni i shtatë i zhvilluar sot, ndërsa të tjerët kanë përfunduar por nuk ka persona të arrestuar, ndërsa shtoi se operacioni është bërë në koordinim me EULEX-in dhe KFOR-in.

“Operacioni ka përfunduar në gjashtë pikat e tjera është duke vazhduar vetëm të këtu, sepse kërkon delikatesë gjatë tërheqjes së mjeteve eksploduese dhe kjo do të përfundoj shumë shpejt,” tha ai duke saktësuar se tërheqja e mjeteve shpërthyese do të bëhet nga njësiti kundër mjeteve eksploduese ndërsa përfundoi:

“EULEX-i dhe KFOR janë vetëm vëzhgues, policia e Kosovës është udhëheqëse e operacionit, kështu që njësiti kundër mjeteve eksploduese që e kemi ne këtu do të merren me këto pajisje.”

Prokuroria Speciale njofton se me urdhër të gjykatës, Policia e Kosovës ka zhvilluar kontrolle në shtatë lokacione në pjesën veriore të vendit, që lidhen me ngjarjet e 24 shtatorit 2023.

Po ashtu, sipas njoftimit kontrollet janë kryer në lokacione të ndryshme, katër në Mitrovicën e Veriut, dy në Zveçan dhe një në Banjskë.

Gjatë këtyre kontrolleve, në një podrum të njërit nga tre soliterët në Mitrovicën e Veriut, janë gjetur një sasi municioni, kallashnikovë, zola, eksploziv etj.

Pjesëmarrës në këto kontrolle ishin edhe zyrtarë nga EULEX-i, kurse te tre rrokaqiejt prezent kanë qenë edhe EOD -KFOR-i, po ashtu EOD e Policisë së Kosovës është në vend të ngjarjes.

Lista paraprake e armëve dhe pajisjeve tjera të sekuestruara:

• 87 copë eksploziv të tipit TM 100

• 3 granata hedhës dore (zola)

• 1 armë automatike AK-47

• 1 minë kundër këmbësorisë e tipit MRUD

• 14 karikatorë

• Municion të kalibrave të ndryshëm

• 63 detonatorë elektrik

• 23 detonatorë mekanik

• 1 orë për aktivizim

• 1 granatë dore M79

• 3 tuba fitila ndezës