AKU bllokon në kufi 42 viça të importuar nga Serbia

Autoriteti Kombëtar i Ushqimit, AKU, duke kontrolluar çdo ngarkesë me mallra ushqimor që hyn në territorin e Republikës së Shqipërisë nëpërmjet Pikave të Inspektimit Kufitar, ka vendosur të mbajë në regjim karantinor 42 krerë viça për therje të ardhur nga Serbia.

“Nga kontrollet e ushtruara me date 17 maj 2019 rezulton se ngarkesa me kafshë të gjalla të ardhura nga Serbia (42 krerë viça për therje) në Pikën e Inspektimit Kufitar në Morinë u kontrollua për përputhshmërinë me kërkesat ligjore për masa mbrojtëse ndaj sëmundjes së Dermatozës Nodulare siç përcaktohen në Urdhrin Nr. 526, date 20.10.2016.

Referuar parashikimeve të këtij urdhri dhe në bashkëpunim me shërbimin veterinar rajonal, AKU vendosi mbajtjen e këtyre kafshëve të gjalla në regjim karantinor (21 ditë) përpara se të futen në proces therje,” bënë të ditur Autoriteti Kombëtar i Ushqimin duke theksuar se vijon pandërprerë kontrollet për të siguruar zbatimin e ligjit dhe mbrojtjen e jetës dhe shëndetit të konsumatorëve, si dhe shprehet e vendosur për të mos toleruar asnjë shkelje të ligjit në dëm të jetës së konsumatorëve.