Albin Kurti: Për Presidentin duhet bashkëpunim me opozitën!
Kryeministri në detyrë, Albin Kurti, tha sot se pas përfundimit të procesit të numërimit dhe certifikimit të rezultateve zgjedhore, prioritet i institucioneve do të jetë konstituimi sa më i shpejtë i legjislaturës së re ndërsa e pranoi se zgjedhja e Presidentit nuk mund të realizohet pa bashkëpunimin e partive opozitare.
Fillimisht, tha Albin Kurti, duhet të përmbyllet i gjithë procesi zgjedhor, përfshirë shqyrtimin e mundshëm të ankesave dhe certifikimin e rezultateve, përpara se të nisin procedurat për formimin e institucioneve të reja.
“Po përmbyllet procesi i numërimit të të gjitha votave dhe duhet të presim edhe disa ditë. Pas certifikimit, synimi ynë është që pa humbur kohë të kalojmë në fazën e konstituimit të institucioneve të legjislaturës së 11-të. Sa më shpejt që të jetë e mundur, aq më mirë,”u shpreh Kurti ndërsa sa i përket zgjedhjes së Presidentit, tha se nevojitet konsensus më i gjerë politik, duke kujtuar se sipas interpretimit aktual kushtetues kërkohet prania e të paktën 80 deputetëve në sallë për të siguruar kuorumin e nevojshëm.
Lëvizja Vetëvendosje, tha Kryeministri në detyrë, nuk i ka votat e mjaftueshme për ta përmbyllur e vetme këtë proces dhe se bashkëpunimi me opozitën mbetet i domosdoshëm.
“Ne do të përpiqemi të ndërtojmë sa më shumë bashkëpunim me opozitën për çështjen e zgjedhjes së presidentit apo presidentes!”
Edhe me këtë rast, Kryeministri në detyrë, Albin Kurti, vazhdoi të përsëris se në të kaluarën partia e tij ka bërë oferta konkrete për bashkëpunim, por sipas tij ato janë refuzuar nga partitë opozitare. Ndonëse përmendi ofertat për bashkëqeverisje, të cilat, sipas tij, nuk kanë gjetur mbështetje, Albin Kurti mbetet fajtori kryesor pse dështoi zgjedhjaj e Presidentit dhe u mbajtën zgjedhjet e 7 Qershorit.
