Altin Dumani është monstra e votës së lirë, Berisha: Nga 48 dosje të krimit zgjedhor, kanë penalizuar vetëm një

“Altin Hajrit, Gjokës, Troplinit dhe Ramës, ka shumë mbiemra ky njeri, armikut të egër të pluralizmit politik dhe të votës së lirë të shqiptarëve, drejtësia vonon, por nuk harron,” ishte mesazhi që Kryetari i Partisë Demokratike, Sali Berisha, i la ish-kreut të SPAK pas zbatimit të masës së sigurisë “detyrim paraqitje” në Prokurorinë e Posaçme, duke e cilësuar Altin Dumanin si monstër të votës së lirë të shqiptarëve.

“Një monstre të vërtetë të votës së lirë të qytetarëve shqiptarë, të cilin Kushtetuta e detyron të hetojë krimin zgjedhor.
Dhe unë kam sot detyrimin t’u informoj se nga 48 dosje të shqyrtuara, kanë penalizuar vetëm një.

Ndërkohë që farsa elektorale zgjedhore është universalisht e konfirmuar tashmë nga OSBE/ODIHR që vëzhgoi zgjedhjet, nga deputetët e Këshillit të Evropës, nga deputetët e Parlamentit Evropian, nga Komisioni i Jashtëm i Parlamentit Evropian dhe IBAR.
Pra, me qindra fakte dhe dokumente të paraqitura nga opozita, por që të gjitha këto për armiqtë e votës së lirë janë hiç asgjë ose nuk ekzistojnë.

Edhe njëherë, e ripërsëris, sulmet e mia të merituara ndaj Altin Troplinit dhe paraardhësit të tij, xhelatit të Sigurimit të Shtetit, Kraja, kanë qenë të lidhura para së gjithash dhe mbi të gjitha me qëndrimin e tyre ndaj dosjeve të famshme të zgjedhjeve në Dibër dhe Durrës. Me atë akt ata dëshmuan në mënyrë flagrante armiqësinë ndaj votës së popullit opozitar,” tha Sali Berisha duke denoncuar skandalin e radhës me Altin Dumanin ku spanjollët sollën dosjen e plotë, por Dumani nxori emrat e biznesmenëve por jo edhe të qeveritarëve.

“Por sot unë dua të informoj shqiptarët se çfarë mercenarësh të pushtetit ka kjo ndërtesë.
Prej 3 vitesh, shqiptarët dëgjojnë dhe kanë dëgjuar takimin famëzi në Aruba të përfaqësuesve të qeverisë shqiptare me bosët e karteleve të drogës.
Prania e përfaqësuesve të qeverisë shqiptare në Aruba është konfirmuar nga gazetari investigativ, ndër më seriozët, i Italisë.
Është konfirmuar nga mediat dhe kjo dihet universalisht.
Aruba është damka më e zezë, është dëshmia më flagrante e narkoshtetit shqiptar, e bashkëpunimit të ngushtë të Edi Ramës me kartelet e drogës.
Tani, çfarë ndodh këto ditë?
Këto ditë, autoritetet spanjolle, dhe jo vetëm ato, kanë sjellë dosjen e plotë, se këtu nuk bëhet asnjë hetim.
Jo, jo, e ndaluar po të jetë për qeverinë.
Pra, sollën dosjen e plotë dhe tani Altin Troplini Rama, vërini çdo mbiemër se i meriton, nxjerr me të drejtë emrat e biznesmenëve të implikuar, por jo të qeveritarëve.
Shikoni se sa të pafytyrë janë.
Shikoni se si këta mbrojnë kriminelët në zyrat më të larta të shtetit.
A ka njeri që nuk e di sot se në çarterin për në Aruba shkuan qeveritarët?
Kush ishin ata?
Asnjëri nuk e thotë se kush ishin.
Dhe ky është Altin Troplini që e fsheh.
Ky është hetimi i tij.
Por unë e garantoj se në këtë mënyrë ai do konsiderohet bashkëpunëtor me klanin Aruba.
A mund t’i fshihet një populli zyrtari kriminel që fluturon nga Tirana në Aruba, që bën marrëveshje për thithjen e parave të drogës, ndërtimin e Malit të Tiranës dhe thuhet edhe në zona të tjera,” tha Kryetari i Partisë Demokratike, Sali Berisha, para Prokurorisë së Posaçme duke përfunduar:

“Dhe tani dalin emrat e biznesmenëve që kanë shkuar, por nuk dalin emrat e qeveritarëve që shkuan dhe firmosën marrëveshje.
Se mafia nuk firmos, i ka kodet e fshehta. Tani Omertën e zbaton Altin Troplini.
Faqezi i them. Ke detyrime ndaj shqiptarëve. Se tani do t’u thuash se është punë sekreti.”