Ambasadori i SHBA takon krerët e LVV dhe LDK
Ambasadori i SHBA në Kosovë, Philip Kosnett, pas takimit me krerët e Lidhjes Demokratike të Kosovës është takuar edhe me Kryetarin e Lëvizjes Vetëvendosje dhe kandidatin për Kryeministër, Albin Kurti.
Në këtë takim ku u diskutua situata politike dhe e sigurisë, Ambasadori Kosnett ka kërkuar nga Albin Kurti formimin sa më të shpejtë të Qeverisë.
Në takim ishin prezent edhe Kryetari i ri i Parlamentit, Glauk Konjufca dhe Nënkryetarja, Arbërie Nagavci.
Para këtij takimi, Ambasadori i Shteteve të Bashkuara në Kosovë, Philip Kosnett ka zhvilluar një takim edhe me krerët e LDK.
Mësohet se temë e takimit ishin situata politike dhe sigurisë si dhe zhvillimet e fundit në Kosovë, përkatësisht mundësia e arritjes së një marrëveshje në mes Lidhjes Demokratike të Kosovës dhe Lëvizjes Vetëvendosje.
Në këtë takim me Ambasadorin Kosnett, përveç kryetarit të LDK, Isa Mustafa, të pranishëm ishin edhe nënkryetarët Vjosa Osmani e Agim Veliu, si dhe anëtari i Kryesisë së LDK-së, Avdullah Hoti.
