Amerika e Edi Ramës dhe Amerika e Albin Kurtit!
nga Agim Popoci
Amerika, një e keqe e domosdoshme! Kështu e përkufizoi Kryeministri Edi Rama në letrën lamtumirëse drejtuar Ambasadores së SHBA, Yuri Kim, ndërsa fliste për futjen e duarve në organizimin jetës sonë institucionale ndërkohë që në Kosovë na dolën shumë më shumë Amerika!
Të alarmuar pse Ambasadori i SHBA në Beograd, Chris Hill po fliste fjalë të mira për Serbinë dhe Vuçiçin, opozita kosovare filloi ta akuzoi Kryeministrin Albin Kurti që do të na prish me Amerikën ndërsa i referohen tensioneve të krijuara në veri me serbët dhe me të dërguarin Gabriel Escobar, sipas tyre, nga Qeveria e Kosovës, si dhe duke e lënë në oazën e pafajësisë si kriminelin Aleksandar Vuçiç ashtu dhe bandat e tij e tij që veprojnë në veri, që nga dita e parë e çlirimit të Kosovës; Dhe, duke harruar njërin ndër rolet kryesore të Amabsadorit Hill në çlirimin e po kësaj Kosove!
24 vjet nuk janë shumë për shqiptarët që të harrojnë se kush është Amerika, pavarësisht se pas një shkëndije gjeostrategjike na shfaqenë po aq Amerika sa ka protagonistë politikë në politikën shqiptare!
Dhe, shqiptarët, përveç se duhet të punojnë në kurimin e memories së tyre historike kombëtare dhe vetë historisë, nuk duhet të bëhen bukshkalë vetëm pse lideri i tyre u thotë se kush është Amerika! Pse?!
Sot, Amerika është ajo që ishte që nga krijimi, ajo e Wilsonit, Bushit dhe Clintonit, por, jo, dhe Amerika e Edi Ramës dhe opozitarëve kosovarë, me gjithë mendimin e tyre dhe rrespektin që kanë shprehur për Amerikën!
Kjo dhe i dallon ata dukshëm me Albin Kurtin!
Amerika e Edi Ramës, e shiti vetë ai në vitin 2011, ishte ajo që nuk i lejoi të rizgjedhet Kryetar i Bashkisë Tiranë, dhe socialistëve të vetë nuk u foli se nuk ishte votuar, se si i kishte vjedhë votat në zgjedhjet e kaluara, madje edhe në betejën me Spartak Ngjelën; Socialistëve, të cilëve iu betua me zë se nuk do ta ndryshoi kurrë politikën antiamerikane ndonëse në subkoshiencën e tij e kishte parasysh dhe bombardimin amerikan të Serbisë së tij të dashur, dhe qëllimet në të ardhmen e tij politike!
Amerika e Edi Ramës, edhe sot mendon Kryeministri i Shqipërisë, e ka besuar kur i tha PO për armët kimike dhe ishte populli shqiptar, pra, nxënësit që i nxori vetë në protesta, që e kundërshtuan këtë vendim të qeverisë ashtu si dhe 100 milionë dollarët e Amerikës; Dhe, Rama u “detyrua” ta ndryshoj vendimin me kërkesën popullore!
Amerika e Edi Ramës, ishte ajo të cilën e kuptoi Kryeministri i Shqipërisë kur erdhi në pushtet, se çfarë kërkon duhet dhënë për të qëndruar në pushtet! Dhe, i hapi të gjitha portat, dhe ato për të cilat nuk i kërkoi njeri çelësin!
Por, me këtë rast, i shkiti një detaj! Kush e besoj?!
Amerika e Edi Ramës ishte ajo e cila e bindi Kryeministrin e Shqipërisë për të kërkuar vullnetarisht strehimin e mbi 4000 muxhahedinëve në Shqipëri, duke e besuar, si çdo shqiptar, se është harruar zëri që kishte ngritur sa ishte në opozitë, kur Saliu mori rreth 200 opozitarë iranianë!
Amerika e Edi Ramës ishte ajo për të cilën Kryeministri i Shqipërisë mendoj se ia hedhi kur e çoi në Zyrën Ovale në takim me Presidentin Obama njeriun që kishte kanabizuar tokën shqiptare, Saimir Tahirin! Pse e prangosi këtë llum socialist, Rama kurrë nuk e tha.
Amerika e Edi Ramës, sipas Kryeministrit të Shqipërisë, e cila e bindi se duhej dhënë Baza Ajrore në Kuçovë, dhe besoj Rama se ajo nuk e kishte mendjen edhe kur ky vendim u mor “pa e pyet popullin”, këtë popull që ishte aq i vëmendshëm kur u lidhë marrëveshja me amerikanët edhe për armë kimike!
Amerika e Edi Ramës, sipas Kryeministrit të Shqipërisë, ajo e cila e bindi për të pranuar edhe afganë, por, çuditërisht po kësaj Amerike e cila i dha edhe çmimin për këtë “gjest human”, i shembi para syve hotelin ku kishte pranuar këta refugjatë afganë me urdhër qeverie!
Amerika e Edi Ramës, sipas Kryeministrit të Shqipërisë, ishte ajo që nuk po kuptonte se si po shkërmoqej sistemi i drejtësisë dhe prokurorët e gjyqtarët po zëvendësoheshin me ushtarë të bindur të Partisë Socialiste. Kur u shfaqën në sipërfaqen e këtij llumi socialistë, ballukët e vettingut dhe felajt e prokurorisë, Rama mendoi se mjaftojnë ca arrestime poshtë e lartë të banidtëve që deri dje i kishte nëpër këmbë!
Amerika e Edi Ramës, sipas Kryeministrit të Shqipërisë, është ajo e cila iu bind projektit serbomadh “Ballkani i Hapur” edhe pse ajo shkatërroi blegtorinë shqiptare dhe tashmë e sigurtë po i vë dryrin industrisë së mishit! Kur vëllai i tij Vuçiç u shfaq me ushtri në kufi me Kosovën, ky mashtrues global e kuptoi se gatishmëria amerikane ishte e lartë përkundër përrallave të Edi Ramës për Presidentin modern të Serbisë!
Amerika e Edi Ramës, sipas Kryeministrit të Shqipërisë, ishte ajo që e besoi edhe për mungesën e arsyeshme të projekteve në Procesin e Berlinit, kur Vuçiç ishte me një thesë projektesh në krah për Serbinë ndërsa ndarja e Kosovës ishte shitur si zgjidhje e problemit! Faji iu la Saliut, i doli koka edhe Likes, por llogaritë socialiste shqiptare me amerikanët rezultuan të pakalkuluara mirë!
Amerika e Edi Ramës, sipas Kryeministrit të Shqipërisë, nuk e ka idenë se çfarë është Kodi Zgjedhor dhe listat e hapura dhe nuk ka pse shqetësohet pse nuk fitoi Partia Demokratike! Dhe, fitorja e tij më 21 Prill mund të quhet dhe një humbje e PD për shkak të qeverisjes së mirë socialiste!
Dhe, në fund, Amerika e Edi Ramës, sipas Kryeministrit të Shqipërisë, nuk e ka idenë se çfarë bënë një zyrtar i lartë i FBI në tokën shqiptare, edhe kur ai bënë hara-kiri ndër demokratë me spiun ordiner të Sigurimit të Shtetit.
Ndryshe nga ky langaraq socialist, Kryeministri Albin Kurti nuk ka shfaqur ndonjë dashuri të madhe për Amerikën ama respekt maksimal PO, duke e njohur gjithmonë si partner strategjik pa të cilin Kosova nuk mund të ketë të ardhme!
Në respekt të kësaj Amerike të Albin Kurtit, Kryeministri i Kosovës, ka vendosur ndërtimin e një shteti ku sundon ligji dhe jo krimi, ku dialogu i Serbisë është i domosdoshëm por jo i shantazhueshëm, kur e ardhmja e këtij shteti është me një marrëveshje përfundimtare dhe jo në varësi të atij që është në krye të shtetit!
Amerika e Albin Kurtit, sipas Kryeministrit të Kosovës, nuk ishte dakord kur partia e tij në opozitë hidhte gaz lotsjellës në seancë parlamentare, por si Lëvizja Vetëvendosje ashtu dhe Kurti e kanë të qartë se çdo pëllëmbë e tokës kosovare vlerësohet me respekt nga SHBA dhe ushtria e saj e cila e çliroi!
Amerika e Albin Kurtit, sipas Kryeministrit të Kosovës, do të jetë krenare kur të sheh se si kriminelët, pavarësisht përkatësisë etnike, do të përfundojnë prapa hekurave. A do të ketë vërjetje për ndonjë aksion, kjo nuk vihet kurrë në dyshim, por jo të gjithë quhen Amerikë!
Amerika e Albin Kurtit, sipas Kryeministrit të Kosovës, mund të jetë e mërzitur kur Serbia nuk respekton sovranitetin e jashtëm, por kurrë nuk do të mërzitet me Qeverinë e Kosovës e cila në emër të revanshizmit do ti lejoj vetes të prangos policë serbë.
Amerika e Albin Kurtit, sipas Kryeministrit të Kosovës, edhe mund ti vëjë sanksione Kosovës dhe do të jetë ajo që do të punojë ngusht me shtetin amerikan për ti sqaruar keqkuptimet. Por, kurrë, në asnjë mënyrë, nuk do të nxjerrë në pazarin politike bisedat që janë zhvilluar kokë më kokë, siç po bënë Aleksandar Vuçiç dhe Milorad Dodik!
Amerika e Albin Kurtit, sipas Kryeministrit të Kosovës, edhe mund ta mirëkuptoj Serbinë me politikën e saj aktuale të jashtme karrshi Rusisë, por kjo asgjë nuk do të ndryshoj në marrëdhëniet Kosovë-SHBA pavarësisht akuzuesëve të përbetuar të opozitës!
Amerika e Albin Kurtit, strehoi afganë në Kosovë! Por, Kryeministri i Kosovës kurrë nuk do të jep urdhër të shemben godinat aty ku qëndruan këta afganë!
Në fund, Amerika e Albin Kurtit, sipas Kryeministrit të Kosovës, mund të mbetet e vetme, që i ka vlerësuar dhe vlerëson kompromiset e dhimbshme që ka bërë Kosova me Planin e Ahtisarit! Por, kjo nuk nuk ndryshon asgjë në marrëdhëniet karrshi Shqipërisë edhe kur ajo ka një Kryeministër injorant si Edi Rama, i cili për rebelimin e 200 serbëve të Vuçiçit kërkon konferencë ndërkombëtare si ajo në Dayton!
Për të tjerët, që nuk quhen Edi Rama ose Albin Kurti, po, është një Amerikë, ajo reale, e cila ka luftuar për padrejtësitë në botë, por, jo vetëm për ato shqiptare!
Po, Amerika kishte për President, Woodroë Wilson, i cili është i dashur për shqiptarët, por ai ishte i dashur edhe për serbët! Madje serbët e konsiderojnë aleatin më të madh gjatë luftës së parë botërore dhe në Konferencën e Paqes në Paris më 1919 ndërsa gjatë mandatit të tij, serbët festuan Ditën Serbe dhe ishte hera e parë dhe e vetme që në Shtëpinë e Bardhë u valvit flamuri i Serbisë!
Kjo nuk e pengoi Amerikën që të ketë një President si George H.W. Bush dhe ti tregojë vijën e kuqe një krimineli si Slobodan Milosheviç ndonëse amerikanët ishin të impenjuar me rënien e Murit të Berlinit dhe zhvillime në Gji!
Pse Presidenti Wilson pas luftës së parë botërore në 14 Pikat e rendit të ri botëror bazuar në tregtinë e lirë, transparencën e marrëveshjeve ndërshtetërore, demokracinë dhe të drejtën e popujve për vetëvendosje, në Pikën 11 kishte kërkuar nga okupatorët që të largohen nga territori i Serbisë dhe ti mundësohet dalja në det, kjo nuk e pengoi Presidentin e Amerikës, Bill Clinton, ta bombardoi Serbinë e cila në harkun kohor pesëvjeçar ishte e gatshme edhe për një gjenocid të dytë, pas Bosnjes më 1995 tashmë në Kosovë më 1999!
Pse Ambasadori Hill me makinën e tij transportonte në kohë lufte të gjithë liderët politikë shqiptarë, dhe transmetonte mesazhet e Amerikës mike për shqiptarët, kjo nuk e përi Amerikën as të Ibrahim Rugovës as të Hashim Thaçit; Dhe, kjo nuk do të thotë se Christopher Hill sot duhet ta qepë gojën!
Thjeshtë, kjo është fuqia më e madhe në botë, Amerika!
