NATO, 30 anëtaret firmosin protokollet e anëtarësimit për Suedinë dhe Finlandën

Anëtaret e NATO-s firmosën protokollet e anëtarësimit të Suedisë dhe Finlandës në Aleancë, në ceremoninë e cila u zhvillua në selinë e NATO-s në Bruksel.

“Kjo është ditë e mirë për Finlandën dhe Suedinë dhe një ditë e mirë për NATO-n,” tha shefi i NATO-s, Jens Stoltenberg, pas firmosjes së prokolleve në një dalje publike me ministrat e Jashtëm të Suedisë dhe Finlandës duke shtuar:

“Me 32 shtete në aleancë, ne do të jemi edhe më të fuqishëm dhe njerëzit tanë do të jenë edhe më të sigurt teksa ne përballemi me krizën më të madhe të sigurisë në dekada.”

Ministri i jashtëm finlandez, Pekka Haavisto, tha se anëtarësimi i shtetit të tij dhe atij suedez, nuk do të kontribojnë vetëm në sigurinë e dy vendeve por edhe në sigurinë kolektive të aleancës. Derisa shefja e diplomacisë suedeze, Anna Linde, duke e cilësuar si ditë historike për Suedinë dhe Finlandën, shprehu bindjen se anëtarësimi i Suedisë do ta forcojë NATO-n dhe do të kontribuojë në stabilitet në kontinetin evropian. 

Në fund Sekretari i Përgjithshëm i Aleancës Veriatlantike, Jens Stoltenberg, tha se dyert e NATO-s mbesin të hapura për demokracitë evropiane që janë të gatshme të kontribojnë në vlerat e përbashkëta ndërsa procesi i ratifikimit të protokolleve do të bëhet në parlamentet kombëtare ku vlerësohet se mund të kalojnë 6-8 muaj deri sa Suedia dhe Finlanda të anëtarësohen në NATO.

Ndryshe, të tronditura nga pushtimi rus i Ukrainës, Suedia dhe Finlanda kanë aplikuar për anëtarësim në NATO më 18 Maj.