Aplikimi i Kosovës për anëtarësim në Këshill të Evropës, sot në rend dite

Sot është një ditë e rëndësishme sa i përket procesit të anëtarësimit të Kosovës në Këshill të Evropës. Komisioni për Politikë dhe Demokraci i Asamblesë Parlamentare të Këshillit të Evropës, APKE, ka vetëm një pikë të rendit të ditës, aplikimin e Kosovës në KiE, përkatësisht raportin e Dora Bakoyannis.

Mbledhjen e Komisionit e kanë konfirmuar ditë më parë nga Këshilli i Evropës, gjersa sot në agjendë të këtij Komisioni është kjo pikë e rendit të ditës.

Në agjendën e Komisionit për Politikë dhe Demokraci thuhet se në rend dite është opinioni statutor për aplikimin për anëtarësim të përcaktuar në letrën e datës 12 maj 2022 drejtuar Sekretarit të Përgjithshëm të Këshillit të Evropës, në përputhje me Rezolutën Statutore (51) 30.

Raportuese është Dora Bakoyannis.

Gerald Knaus, nga Iniciativa Evropiane për Stabilitet, ka bërë të ditur dy pika të opinionit të Dora Bakoyannis, raportuese në Komisionin e Çështjeve Politike të Asamblesë Parlamentare të Këshillit të Evropës, APKE, për aplikimin e Kosovës për anëtarësim.

Përmes një postimi në rrjetin social X, Gerald Knaus shkruan se opinioni i Ish-Ministres së Punëve të Jashtme të Greqisë, aktualisht raportuese për Komisionin e Çështjeve Politike të Asamblesë Parlamentare të Këshillit të Evropës thotë që Asambleja i rekomandon Komitetit të Ministrave që ta ftojnë Kosovën që të bëhet anëtare e Këshillit të Evropës.