“Arrest me burg”, autori që plagosi punonjësin e IMT-së: Më vodhën 80 mijë € kur shembën shtëpinë!

“Arrest në burg” ishte masa e sigurisë që caktoi Gjykata e Tiranës për 55-vjeçarin, Qani Muça, i cili tre ditë më parë plagosi me armë zjarri punonjësin e Inspektoratit të Mbrojtjes së Territorit, Ilirjan Gavelli, dhe sot akuzohet për “tentativë vrasje ndaj funksionarëve publike” mbetur në tentativë dhe “armëmbajtje pa leje”.

Në gjykatë, Qani Muça tha se arma nuk ishte e tij por e punonjësit të IMT-së, dhe konflikti lindi pas provokimit të inspektorit, që i tha se “nuk deshe të marrësh hyrje, rri mes 4 rrugëve tani”.

Dhe jo vetëm kaq! Qani Muça ka pretenduar se punonjësit e IMT-së i kanë vjedhur edhe rreth 80 mijë euro, që i ka pasur të fshehura në godinë.

Ndërkohë Ilirjan Gavelli në dëshminë e tij për policinë ka deklaruar se kishte tentuar t’i hiqte pistoletën nga dora Muçës dhe në këtë moment arma është shkrepur dy herë.

“Unë instiktivisht jam hedhur dhe ja kam kapur pasi isha në distancë 2-3 metra larg tij. Në momentin që i kam kapur armën, ai e ka shkrepur dhe kam ndjerë që plumbi më preku në pjesën e barkut. Kam vazhduar të përleshem me të për t’i hequr pistoletën, por mesa mbaj mend pistoleta ka shkrepur për herë të dytë, ndërsa unë vazhdoja ta mbaja të bllokuar nga duart,” tha punonjësi i IMT-së në dëshminë e tij në polici.