Arrestimi i Ish-luftëtarit të UÇK-së, protesta në Gjakovë

Protesta paqësore e organizuar sot nga OVL-UÇK për lirimin e ish-luftëtarit të UÇK-së, Tomor Morina mblodhi në Gjakovë qindëra qytetarë, familjarë e bashkëluftëtarë të Tomorit. ku i pranishëm ishte edhe Kryetari i Komunës së Gjakovës, Ardian Gjini.

Duke u shpreh i mllefosur për arrestimin e Morinës nga autoritetet maqedonase, Gjini ka bërë thirrje para protestuesve që Tomor Morina të kthehet në familjen e tij.

“Secili prej nesh e kemi sot një mllef dhe me plot të drejtë. Është e pakuptimtë që ende njëzet vite pas lufte, ata që kanë kryer krime kërkojnë të na dënojnë. Tomorin e duam sa më shpejtë në mesin tonë, në familjen e tij e mes miqve,” tha Gjini duke bërë publike bisedat që ka zhvilluar me kryeministrin dhe autoritetet shtetërore të Maqedonisë së Veriut dhe siç tha ai shumë shpejtë gjithçka do të konkretizohet.

Ndryshe, Ish-ushtari i Ushtrisë Çlirimtare të Kosovës, Tomor Morina javën e kaluar është ndaluar nga policia e Maqedonisë së Veriut në kalimin kufitar Bllacë, bazuar në fletëarrestin e Interpol Serbia me akuzën “krim ndaj njerëzimit”. Autoritetet maqedonase i kanë caktuar Tomor Morinës paraburgim prej 30 ditësh, për të pritur faktet e Serbisë për këtë rast.