Arrestohen dy rusë në Mal të Zi me 19 valixhe. Ata kishin 1 milion euro
Gjatë kontrollit të objekteve në bregdetin malazez të përdorura nga dy shtetas rusë të arrestuar, u gjetën rreth një milion euro dhe pajisje shtesë IT. Dyshohet se një pjesë e pajisjeve të konfiskuara përdoret për monitorim dhe spiunazh.
Sipas informacioneve nga e përditshmja malazeze Vijesti, policia kontrolloi dje objektet në Budva dhe Bar të cilat u përdorën nga Aleksandar Mihailoviç Krugljanski, 31 vjeç, dhe Aleksandra Krugljanska, 42 vjeçe. Shtetasit rusë u arrestuan më 23 shtator në aeroportin e Tivatit ndërsa përpiqeshin të hipnin në një fluturim për në Tel Aviv me 19 valixhe.
Përmbajtja e bagazheve të konfiskuara
Pas inspektimit të bagazheve, policia njoftoi zyrtarisht se gjeti 26.210 euro dhe 1.150 shekel izraelitë, një sasi të madhe pajisjesh elektronike dhe ilaçesh të padeklaruara. Mediat raportuan se më shumë se gjysma e valixheve përmbanin pajisje të dyshuara se përdoren për monitorim, mbikëqyrje dhe spiunazh, si dhe për zbulimin e pajisjeve të dëgjimit.
Midis sendeve të sekuestruara janë një pajisje GPS me mikrofon dhe një detektor profesional BugHunter BH-04. Fjala është për një pajisje për zbulimin e transmetuesve radio, siç janë mikrofonat dhe kamerat pa tel të fshehura. Kamerat e mbikëqyrjes, pajisjet e mbikëqyrjes me video, komponentët e kompjuterit, pajisjet e memories dhe kabllot mund të shihen gjithashtu në fotografitë me sendet ve konfiskuara.
Kanë qëndruar disa herë në Mal të Zi
Sipas informacioneve të gazetës malazeze, dyshja e arrestuar kishte viza turistike dhe kishte qëndruar më parë disa herë në Mal të Zi. Ata akuzohen zyrtarisht për kontrabandë dhe pastrim parash.
Administrata e policisë njoftoi se po kryen hetimin në koordinim me prokurorin kompetent, Agjencinë e Sigurisë Kombëtare të Malit të Zi, shërbime të tjera të sigurisë dhe komunitetin ndërkombëtar të inteligjencës. Qëllimi i hetimit është të përcaktojë origjinën dhe qëllimin e parave dhe pajisjeve, si dhe të gjitha rrethanat e qëndrimit të të dyshuarit në Mal të Zi.
