Arrestohet 52-vjeçari, ja çfarë i gjeti policia gjatë kontrollit…

Një 52-vjeçar u arrestua nga policia e Dibrës, pasi iu gjetën dhe sekuestruan 7 copë kallëpe me lëndë plasëse, 58 kapsolla detonatorë dhe 4 metër fitil zjarrpërcjellës. Sipas një njoftimi zyrtar të policisë, shtetasit Nj.P iu gjet kjo sasi municioni në një lokal.

Njoftimi i Policisë, Dibër

Vijojnë kontrollet nga strukturat e policisë për parandalimin e ngjarjeve kriminale.

Sekuestrohen lëndë plasëse, fitil zjarrpërcjellës dhe kapsolla detonatore

Arrestohet në flagrancë poseduesi

Në vijim të punës për parandalimin e ngjarjeve kriminale, parandalimin e konflikteve dhe goditjen e paligjshmërisë, strukturat e policisë së Dibrës kanë ushtruar kontrolle të befasishme në disa ambiente ku në një lokal u gjetën dhe u sekuestruan lëndë plasëse, kapsolla e fitil zjarrpërcjellës.

Nga Specialistët për Hetimin e Krimit në Komisariatin e Policisë Dibër, u arrestua në flagrancë shtetasi:

Nj. P., 52 vjeç, banues në Peshkopi.

Arrestimi i tij u bë pasi gjatë kontrollit të ushtruar në magazinën e lokalit të tij në qytetin e Peshkopisë, iu gjetën të fshehura dhe iu sekuestruan në cilësinë e provës materiale:

7 kallëpe me lëndë plasëse ( 400 gr. secili), gjithësej 2 kg e 800 gr.

58 copë kapsolla detonatore.

Si dhe rreth 4 metër fitil zjarrpërcjellës.

Materialet hetimore do t’i referohen Prokurorisë Pranë Gjykatës së Shkallës së Parë Dibër, për veprën penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 i Kodit Penal.