Arrestohet kreu i SHISH, Presidenti mbledh Këshillin e Sigurisë për të thënë se kjo është çështje individuale

Pas 13 vjet grabitjeje të shtetit shqiptar nga ana e Qeverisë Rama ku Kryeministri Edi Rama nuk pushoi së përsërituri që përgjegjësia është individuale, Presidentit të Republikës, Bajram Begaj, iu desht një javë të mbledh Këshillin e Sigurisë Kombëtare ndonëse i ra piramida e sigurisë shtetërore me arrestimin e Drejtores së Shërbimit Informativ, Vlora Hyseni, dhe caktimin e masës së sigurisë nga Gjykata e Posaçme për Korrupsion dhe Krimin e Organizuar me arrest në shtëpi dhe pezullim nga detyra, si person në hetim për dy vepra penale, nxjerrje e sekretit hetimor dhe përkrahje të autorit të krimit, për të konkluduar sot klishetë e Ramës se çështja është individuale dhe nuk duhet të kthehet në krizë besimi ndaj shtetit dhe ndaj institucioneve të sigurisë.

“Hetimet e drejtësisë të zhvillohen tërësisht të pavarura dhe të respektohen nga të gjithë. Çështjet individuale të mos kthehen në krizë besimi ndaj shtetit dhe ndaj institucioneve të sigurisë.

Institucionet t’u tregojnë qytetarëve se sistemi di të korrigjojë vetveten e të mbrojë interesin publik. Detyra jonë është të forcojmë standardet, kontrollin, transparencën, llogaridhënien dhe bashkëpunimin institucional,” thekson Presidenti përmes një njoftimi duke theksuar se Shqipëria ka institucione, ka partnerë dhe aleatë ndërkombëtarë, ka profesionistë dhe kapacitete, por harron se kishte dhe ka spiunë të Serbisë në krye të piramidës shtetërore.

Dhe jo vetëm kaq!

Ndonëse në mbledhjen e Këshillit të Sigurimit Kombëtar, përveç anëtarëve që përcakton ligji, ishin të ftuar edhe institucioni e Prokurorisë së Përgjithshme dhe SPAK-u, asnjë fjalë nuk u tha për shantazhimin e gazetares Klodiana Lalës nga kreu i Shërbimit Informativ Shtetërore, Vlora Hyseni, para GJKKO, duke u sjellë si pronare e informacionit konfidencial që shkon deri tek spiunët e Serbisë në dhomat e hotelit Rogner në Tiranë.