Athinë, Gjykata Supreme e Greqisë vendos për ekstradimin e agjentëve maqedonë

Gjykata Supreme e Greqisë ka filluar seancën për shqyrtimin e kërkesës për ekstradimin e dy agjentëve maqedonë të shërbimit informative, DSK, Goran Gruevski dhe Nikolla Boshkovski.

Gjykata ka në shqyrtim mbi 20 çështje ndërsa ajo e ekstradimit të agjentëve maqedonë është e fundit.

Ndryshe, pasi Gjykata e Selanikut i dha dritë jeshile ekstradimit të dy pjesëtarëve të DSK , më 5 Janar, Gjykata Supreme e Greqisë në Athinë deri më tani ka zhvilluar 5 seanca për shqyrtimin e rastit.

Për Ish-shefin e Drejtorisë për Siguri dhe Kundërzbulim, Goran Grujevski dhe kolegun e tij Nikolla Boshkovski, janë lëshuar fletëarreste ndërkombëtare nga Shkupi pas akuzave të Prokurorisë Speciale të Maqedonisë për përgjim të paligjshëm të mijëra qytetarëve përmes sistemeve të monitorimit të MPB dhe shkatërrimin fizik të sistemeve që janë përgjuar për të mos lënë prova për shkeljen masive të të drejtave dhe lirive të njeriut. Këto janë objektet e Prokurorisë Speciale “Kalaja” dhe “Synimi”, të cilat tashmë janë bashkuar në një rast.