Atraksionet turistike më zhgënjyese në botë
Atraksionet që njerëzit i kanë në listën e ëndrrave nuk përmbushin gjithmonë pritshmëritë. Një studim që analizoi gati 100 mijë komente për 200 atraksione të mëdha zbuloi destinacionet që kanë më shumë gjasa t’i lënë vizitorët të zhgënjyer, me ankesa që variojnë nga turmat dhe çmimet e larta, te përvoja që thjesht nuk e justifikon famën.
Nga monumentet ikonike te parqet tematike me famë botërore, disa atraksione premtojnë përvoja të paharrueshme, por jo gjithmonë për arsyet e duhura.
Një studim i ri, që analizoi gati 100 mijë komente vizitorësh, ka zbuluar atraksionet turistike që kanë më shumë gjasa t’i lënë udhëtarët të zhgënjyer. Për të dytin vit radhazi, në krye të listës është renditur një destinacion i njohur britanik.
Ankesat për turmat, çmimet jo të arsyeshme dhe përvojat që nuk përmbushin pritshmëritë kanë bërë që disa prej emrave më të njohur në botë të marrin vlerësime negative.
Sipas studimit të Radical Storage, vendi më zhgënjyes rezulton të jetë Alton Towers në Angli, i ndjekur nga Georgia Aquarium dhe Horseshoe Casino, të dyja në Shtetet e Bashkuara.
Si u përpilua renditja?
Duke u nisur nga një listë prej 5.832 atraksionesh turistike në 50 nga vendet më të vizituara në botë, bazuar në raportet e EuroMonitor dhe Mastercard, studiuesit e Radical Storage e ngushtuan përzgjedhjen duke përjashtuar atraksionet që kishin më pak se 2.000 komente nga vizitorët.
Atraksionet në Rusi, Ukrainë dhe Izrael u përjashtuan nga studimi për shkak të konflikteve të vazhdueshme. Pas këtij filtrimi, ekspertët analizuan 99.547 komente vizitorësh.
Për të krijuar renditjen, ekipi përdori 90 fjalë kyçe që shfaqeshin më shpesh në përshkrimet e vizitorëve. U përjashtuan rastet që mund të krijonin keqkuptime, si fraza “jo zhgënjyese”, ndërsa fokusi u vendos te terma si “i mërzitshëm” dhe “i paarritshëm”. Më pas u llogarit përqindja e komenteve negative për secilin atraksion.
Mesatarisht, 5.2 për qind e komenteve për atraksionet e studiuara ishin negative, por disa destinacione kishin përqindje dukshëm më të larta.
Studimi zbuloi gjithashtu se Britania e Madhe dhe Kanadaja janë vendet me përqindjen më të lartë të atraksioneve zhgënjyese 7.9 për qind, të ndjekura nga Shtetet e Bashkuara 7.5 për qind.
Ndër qytetet, më zhgënjyeset rezultuan të jenë Seattle 8.9 për qind, Budapesti 6.3 për qind, Londra dhe Bangkoku nga 6 për qind. Po ashtu, gjashtë nga dhjetë atraksionet më zhgënjyese në botë ndodhen në Amerikën e Veriut.
Atraksioni më zhgënjyes në botë
Alton Towers në Britaninë e Madhe u rendit për të dytin vit radhazi si atraksioni turistik më zhgënjyes në botë.
Mbi një e treta e komenteve 38.2 për qind raportojnë përvoja negative, ku ankesat më të zakonshme lidhen me mbipopullimin dhe raportin e dobët cilësi-çmim.
Alton Towers regjistroi gjithashtu përqindjen më të lartë të komenteve që ankoheshin për vlerën e ulët kundrejt çmimit: 15 për qind, krahasuar me mesataren prej vetëm 1.3 për qind në të gjithë studimin.
Nuk janë lojërat ato që zhgënjejnë më shumë vizitorët në Alton Towers, por shërbimi ndaj klientit, informacionet që duken çorientuese për biletat dhe kostot shtesë për ushqim, pije apo akses në zona të ndryshme të parkut.
Megjithatë, për parkun më të madh tematik në Britani ka edhe një lajm pozitiv: vitin e kaluar 49.4 për qind e komenteve ishin negative, ndërsa këtë vit kjo shifër ra në 38.2 për qind.
Georgia Aquarium në Atlanta, SHBA, renditet si atraksioni i dytë më zhgënjyes. Edhe pse është shtëpia e dhjetëra mijëra krijesave detare, 19.6 për qind e komenteve përmbanin fjalë negative.
Sipas studimit, 10 për qind e vizitorëve u ankuan për mbipopullim ose probleme me aksesin, ndërsa 6.2 për qind menduan se përvoja nuk ia vlente paratë.
Horseshoe Casino në Louisiana, SHBA, renditet gjithashtu ndër atraksionet më zhgënjyese. Edhe pse ofron lojëra tavoline, automate, poker dhe disa mundësi ushqimi, 18.6 për qind e vizitorëve lanë komente për përvoja negative.
Në 16.6 për qind të komenteve u përdorën fjalë si “i mërzitshëm”, “i amortizuar”, “i mbivlerësuar” dhe “ka nevojë për restaurim”, çka sugjeron se atraksioni nuk përmbush pritshmëritë.
Széchenyi Baths and Pool në Budapest, banja më e madhe mjekësore në Evropë, është një destinacion ëndrrash për shumë turistë. Megjithatë, sipas studimit, 16.6 për qind e vizitorëve që lanë komente raportuan një përvojë negative.
Te Széchenyi Baths në Budapest, problemet kryesore ishin mbipopullimi dhe aksesi. Këto u përmendën në 7.2 për qind të komenteve, krahasuar me mesataren 2.1 për qind.
Ripley’s Aquarium of Canada në Toronto renditet gjithashtu ndër atraksionet më zhgënjyese. Edhe pse ka mbi 20 mijë kafshë ujore dhe ekspozita interaktive, 16 për qind e vizitorëve lanë komente negative.
Ankesa kryesore ishte mbipopullimi: 9.6 për qind e komenteve e përmendnin këtë problem. Ndërsa 5% e vizitorëve mendonin se akuariumi nuk ia vlente paratë.
Top 10 atraksionet më zhgënjyese:
1. Alton Towers, Britani e Madhe – 38.2%
2. Georgia Aquarium, SHBA – 19.6%
3. Horseshoe Casino, SHBA – 18.6%
4. Széchenyi Baths, Hungari – 16.6%
5. Ripley’s Aquarium of Canada – 16%
6. Universal Islands of Adventure, SHBA – 15.6%
7. Siam Park, Spanjë – 13.4%
8. Space Needle, SHBA – 12.6%
9. Graceland, SHBA – 12.6%
10. Fushimi Inari-taisha Shrine, Japoni – 12%. /Euronews/Monitor/
