Autobusi i linjës Prishtinë Hanover aksidentohet në Austri, 19 të lënduar tre prej tyre rëndë

Autobusi i linjës Prishtinë- Hanover është aksidentuar në orët e para të mëngjesit të sotëm në autostradën pranë Eugendorf me ç’rast janë lënduar 19 udhëtarë tre prej të cilëve në gjendje të rëndë.

Mësohet se pas aksidentimit të autobusi pronë e kompanisë “Armend Tours” në vend ngjarje kanë shkuar për ndihmë Kryqi i Kuq dhe zjarrfikësit.

“Aktualisht dimë për tre të lënduar rëndë dhe 16 të lënduar lehtë”, tha zëdhënësja e Kryqit të Kuq, Roberta Thanner për APA.

Aksidenti ndodhi rreth orës 03:00 mes kryqëzimeve Salzburg-Nord dhe Wallersee në drejtim të Vjenës, ku aktualisht po ndërtohet dhe lëvizja e automjeteve është e vështirësuar.

“Autobusi ka të ngjarë të jetë përplasur në trafik ndarësen prej betoni, për arsye që janë ende të paqarta,” tha për APA zëdhënësi i policisë Hans Wolfgruber.

“Ishin rreth 25 persona në autobus,” sqaroi për APA, komandanti i shpëtimit të qarkut Hermann Gerstgraser. Sipas tij, tre pasagjerë u lënduan rëndë dhe 16 të tjerë pësuan lëndime më të lehta.

“Të gjithë u dërguan në spitalin e Salzburgut me automjetet e shpëtimit,” thotë Gerstgraser deri sa Wolfgruber saktësoi se autobusi po udhëtonte nga Kosova për në Hanover.

“Këta janë turistë që padyshim vijnë nga Kosova,” tha ai.

Brigadat e zjarrfikësve të Hallwang dhe Eugendorf erdhën me rreth 60 vullnetarë me tetë automjete, dhe Kryqi i Kuq mbërriti me rreth 50 ndihmës në 14 automjete ndërkohë ishin autoambulanca nga Flachgau e Salzburgu, dhe një automjet nga Freilassingu i Bavarisë me tre mjekë të urgjencës.

Ndryshe, autobusi i aksidentuar është dëmtuar shumë dhe deri në orën 6:00 ndodhej në vendin e aksidentit, kohë deri kur ishte e bllokuar edhe autostrada.