“Babale”, Prokuroria merr të pandehur Ervin Salianjin

Prokuroria e Tiranës merr të pandehur Ish-deputetin e Partisë Demokratike Ervin Salianji, për çështjen e shumë përfolur të audiopergjimit “Babale”.

Burime nga Prokuroria bënë të ditur se Salianji është njoftuar që të paraqitet ditën e premte për t’u njohur me akuzat.

Përveç Ervin Salinjani nën hetim janë dhe Albert Veliu dhe i afërmi i tij Fredi Alizoti për të cili drejtësia thotë se imitoi zërin e Agron Xhafës, si dhe gazetari Jetmir Olldashi.

Ndryshe, më 25 shkurt,  Gjykata e Tiranës pranoi kërkesën e deputetit të PD, tashmë me mandat të dorëzuar, Ervin Salianji, për moszgjatjen e hetimeve në çështjen “Babale”. Kur doli nga Gjykata, Salinaji u shpreh:

“Prokurori tërësisht politike dhe në shkelje të ligjit, prokurori që vazhdon çështjen nuk ka guxuar të marrë mostrat e zërit të vëllait të ish ministrit Xhafaj, prokurori tjetër që është shtuar është një prokuror që ka lidhje të afërta me drejtuesin e MB sot, pra një hetim tërësisht politik, nuk ka arsye të zgjaten hetimet, vetëm për të mbajtur tymnajë, ne kemi kërkuar thjesht për të mbajtur në dijeni publikun që vazhdon në fakt një hetim jo për personin që sot është në burg në Itali, por gazetarin dhe ne e kemi denoncuar dhe do vazhdojmë të denoncojmë. Kemi tashmë një vendimmarrje që na con te qytetarët nesër në 10 para kuvendit për gjithë qytetarët.”

Ndërkohë Gjykata i la afat prokurorisë deri në 20 mars që të kryejë të gjitha veprimet hetimore dhe të marrë një vendim, se çfarë do të bëjë me hetimet për rastin “Babale”, dosje në të cilën Ervin Salianji akuzohet për kallëzim të rremë.