“Babalja”/ Pas seancës, Bardhi: Gjyq politik për të na intimiduar!
Në përfundim të seancës gjyqësore të radhës kundër Albert Veliut dhe personave të tjerë të akuzuar në çështjen “Babalja”, Sekretari i Përgjithshëm i PD, Gazment Bardhi, sqaroi se erdhi sot në gjykatë me vullnetin e tij të lirë dhe se ishte informuar nga mediat.
Gazment Bardhi tha në gjykatë se PD vendosi ta publikojë përgjimin për Agron Xhafajn pasi vëllai i ministrit të Brendshëm kryente trafik droge me mbështetjen e politikës ndërsa sqaroi se nuk e ka takuar kurrë më parë Fredi Alizotin.
“Jo nuk pati asnjë përballje me Fredi Alizotin, atë zotëri e shikoja për herë të parë dhe nuk jam takuar kurrë me të. Me Albert Veliun, jam takuar darkën e ditës që bëmë denoncimin e vëllait të ish-ministrit Xhafa,” tha Bardhi duke përsëritur se ky është një gjyq i montuar politik për të intimiduar përfaqësues të Partisë Demokratike që të mos kryejnë më denoncime të këtij lloji.
“Ka patur një çështje të regjistruar në Prokurorinë e Krimeve të Rënda për përfshirje në trafik droge të shtetasit Agron (Geron) Xhafa, dhe sot që ne flasim, nuk ka asnjë rezultat mbi këtë hetim, sikundër, për shkak të denoncimit të Partisë Demokratike, dhe veprimit të Ligjit Antimafia, Prokuroria e Krimeve të Rënda, duke qenë se shtetasi Agron (Geron) Xhafaj ishte subjekt i ligjit antimafia, deklaroi asokohe që ka nisur një hetim pasuror ndaj shtetasit Agron (Geron) Xhafa, në zbatim të Ligjit Antimafia.
Edhe pse ka kaluar më shumë se një vit askush prej nesh nuk di çfarë po bëhet me këtë hetim pasuror. A i ka rezultuar prokurorisë se pasuria e vëllait të ish-ministrit të brendshëm Fatmir Xhafa është vënë apo jo nga veprimtaria kriminale si trafikant droge apo anëtar i një grupi të strukturuar kriminal që merrej me trafik droge.
E gjitha kjo provon edhe njëherë se ky proces që zhvillohet në Gjykatën e Tiranës është një proces i montuar politikisht, ndaj denoncuesve dhe përfaqësuesve të opozitës që denoncuan këtë rast,” tha Sekretari i Përgjithshmëm i PD, Gazment Bardhi, duke saktësuar se qëllimi është të intimidojnë përfaqësuesit e opozitës për të mos denoncuar krimet në të cilat përfshihen individë me lidhje të forta politike, ndërkohë që në thelb të të gjithë punës së organit të prokurorisë është pikërisht garantimi i pandëshkueshmërisë për persona që gëzojnë mbështetje politike të qeverisë aktuale, siç është edhe vëllai i ish-ministrit të brendshëm Fatmir Xhafaj.
