“Balluku”, Igli Tare i pandehur, SPAK i komunikon akuzën për pastrim parash
I pandehur për pastrim parash, pasi fshehu në emër të tij dy vila të Ish-Zv/Kryeministres Belinda Balluku, sot Prokuroria e Posaçme kundër Korrupsionit dhe Krimit të Organizuar, SPAK, i ka komunikuar zyrtarisht akuzën, Igli Tares
Bëhet fjalë për dy vila, në Palasë dhe Dhërmi, të cilat u sekuestruan nga SPAK. Ndërkohë, ditën e sotme, pritet që Prokuroria t’u komunikojë akuzat edhe disa biznesmenëve të përfshirë në tenderë.
Një ditë më parë, Prokuroria e Posaçme i komunikoi akuzat përfundimtare ish-zëvendëses së Edi Ramës: shkelje të barazisë në tendera në 9 raste, korrupsion pasiv në dy cilësi të ndryshme, pastrim parash dhe fshehje dhe mosdeklarim pasurie të dy vilave në jug.
Vilat e sekuestruara
Vila e parë u zbulua në Dhërmi, me një vlerë prej 145 mijë eurosh, dhe u sekuestrua në qershor. SPAK dyshon se Balluku e ka përfituar vilën si ryshfet për një tender në këmbim të favorizimit të kompanisë “Eurocol”, me fond limit 88.6 milionë lekë dhe një shtesë kontrate prej 14.1 milionë lekësh në kohën që kur ajo drejtonte “Albcontrol”.
Sipas organit të akuzës, për të fshehur pronësinë reale të vilës, Balluku ka përdorur Igli Taren dhe vartësen e saj në kohën kur drejtonte Albcontrol, shtetasen J.B, përmes kontratave të porosisë dhe qirasë të konsideruara fiktive nga hetuesit.
Ndërsa vila e dytë, në Palasë, iu sekuestrua në shtator. Sipas SPAK, Belinda Balluku dyshohet se e përfitoi vilën në Palasë në këmbim të favorizimit të kompanisë “Alko Impex General Construction” në tenderin për Lotin 7 të Unazës së Jashtme të Tiranës, me fond limit rreth 23.5 milionë euro.
Sipas hetimit, investimi në vilë u krye nga pronari i kompanisë fituese, Arbër Abazi, me një vlerë që SPAK e përllogarit nga 288,616 deri në 410,526 euro. Fillimisht, për ndërtimin e saj deri në fazën e karabinasë dyshohet se është përdorur Igli Tare, përmes një kontrate sipërmarrjeje prej 250 mijë eurosh.
Ndryshe, SPAK pretendon se Belinda Balluku e ka fshehur pronësinë reale duke e regjistruar vilën në emër të Igli Tares. Për këtë qëllim, sipas prokurorisë, është përdorur edhe një kontratë e dyshuar si fiktive shitjeje, e datës 12 shtator 2025.
