Bashkitë s’kanë fonde, Rama: Në Shqipëri, problemin e ndotjes e krijojnë njerëzit!
Shqipëria nuk është një vend i ndotur dhe nuk ka problem atë që kanë vendet e industralizuara me ndotjen, por Shqipëria ka problemin e ndotjes së krijuar nga njerëzit. Ky është një turp i madh! Kështu u shpreh Kryeministri Edi Rama para kryetarëve të bashkive dhe prefektëve të qyteteve bregdetare duke folur për pastrimin e territorit ku ndërsa shtoi se kjo nuk ka lidhje me politikën dhe partitë kundërshtoi edhe vetën e vet pasi konstaton se kostoja e pastrimit është më e lartë se tarifa për qytetarët dhe bashkitë e përballojnë me fonde ekstra një pjesë të kostos.
Dhe jo vetëm kaq! Në Lezhë, aty ku nuk ka ndonjë taksë marramendëse për pastrimin apo mbështetje speciale nga qeveria e ku jetojnë njerëz, me mirëorganizimin e menaxhimit të mbetjeve bashkia është e pastër, dhe Rama e solli si shembull suksesi.
“Ne duam që ta fitojmë këtë sfidë që është një sfidë që s’ka lidhje me politikën, me partitë përveç se të qenit njerëz të ndërgjegjshëm, qytetarë dinjitozë në raport me pastërtinë. Është e paimagjinueshme që Shqipëria të njolloset nga pisllëku në sytë e turistëve, pisllëku të jetë i legalizuar në sytë e fëmijëve. Fatmirësisht Shqipëria nuk është një vend i ndotur dhe nuk ka problem atë që kanë vendet e industralizuara me ndotjen. Shqipëria nuk e ka këtë problem. Nuk është e ndotur nga zhvillimi që prodhon helme. Është një fat i madh, por Shqipëria ka problemin e ndotjes së krijuar nga njerëzit. Ky është një turp i madh! Sigurisht Shqipëria është më e pastër se ç’ishte dje, por në raport me si duhet të jetë është turp për ne të gjithë. E filloj nga vetja dhe deri tek qytetari më i fundit që e ka në ndërgjegjen e vet hedhjen e mbeturinave në rrugë. Nuk mundet ne të pajtohemi me këtë,” tha Edi Rama duke mor si shembull Pyllin e Sodës në Vlorë, ku edhe pas një muaj pastrimi plehrat nuk kanë mbaruar.
“E filluam këtë plan tek Pylli i Sodës, po bëhet afro një muaj. E imagjinoni, vazhdon pastrimi. Që nga ajo ditë dhe deri tani nuk kanë mbaruar akoma plehrat. Plehrat në pyllin e sodës kanë 30 vjet. Jemi duke pastruar një territor, ku hedhja e plehrave është kthyer në një fenomen arkeologjik. Në 30 vjet nuk ka shkuar këmbë njeriu nga bashkia e Vlorës të pastrojë. Sa më thellë futesh në atë pyll, aq më shumë ndeshesh me plehra. Duhet të bashkojmë forcat, bashkitë kanë kusuret e tyre, qeveria ka të vetat. Secili të bëjë të vetën. Kusurin më të madh e kanë individët.”
Por jo gjithçka në qeverisjen socialiste është bardh e zi dhe as Edi ose Ramë. Kryeministri konstaton se bashkitë nuk kanë fonde të mjaftueshme, dhe gjenë një bashki ku ndonëse nuk ka fonde apo mbështetje speciale nga qeveria, dhe ka njerëz, Lezha është e pastër sepse menaxhimi i plehrave është mirëorganizuar.
“Kjo është një sfidë qytetarë. Është shumë e qartë që pastrimi ka një kosto që është më e lartë se çfarë bashkitë i faturojnë qytetarëve dhe bizneseve. E them këtë për të gjithë ata që në vend se ta fillojnë nga vetja, por e fillojnë ne paguajmë taksa bashkitë nuk na përgjigjen. Që të jemi të qartë kontributet përmes tarifave të pastrimit janë nën kostot e pastrimit për Bashkitë.
Kjo bën që Bashkitë të përballojnë me fonde ekstra një pjesë të kostos. Plehrat në rrugët kombëtare janë akte papërgjegjshmëri e mijëra njerëzve që hapin dritaren e makinës dhe i hedhin. Na duhet një qasje më agresive në këtë fushë. Të adresojmë edhe atë që qytetarët e kërkojnë me ngulm, gjobat,” tha Kryeministri Edi Rama duke gjetur arsye për të reflektuar.
“Vitin e ardhshëm do të fillojmë me katër zonat më kritike për të vijuar me zonat bregdetare. Por ka një tjetër arsye për të reflektuar sepse kemi një model që e bën më shqetësues situatë që tregon që përtej të gjitha shtrëngimeve financiare, lidershipi i Bashkisë dhe organizimi luan një rol që mund të arrijë deri në pikën që mund t’i kapërcejë këto probleme. Në Bashkinë e Lezhës kemi pasqyre ndryshe nga pjesa tjetër dhe as nuk ka ndonjë taksë marramendëse për pastrimin apo mbështetje speciale nga qeveria. Por ka një skemë organizimi përmes së cilës arrin të garantojë, ndoshta jo 100 % të shkëlqyer, por është një kuotë të lartë pozitive.
Sezonin e ardhshëm është mirë të adresojmë edhe problemin e pastrimit të plazheve. Është e domosdoshme që sëbashku të adresojmë edhe aspektin e ndëshkimit, gjobave. Por në fund të ditës i gjithë ky zinxhir nuk funksionon nëse Policia e Shtetit nuk e përfshin krimin mjedisor si pjesë e punës të përditshme dhe vazhdon të ketë dobësi.”
Por, ky ish-menaxher me namë i bashkisë më të madhe në Shqipëri, Tiranës, që sot është Kryeministër zgjidhjen e gjenë te bizneset që duhet të paguajnë më shumë për pastrimin dhe gjobat e larta, që ulin më shumë problemin.
“Ndarja e plazheve duhet të bëhet me kritere shumë strikte dhe duhet të mbarojë historia e atyre që vijnë nga ana tjetër e vendit për të marrë plazhe. Hotelet që janë në vijën e parë kanë të drejtë ta shfrytëzojnë përkundër taksës që i paguajnë bashkisë. Pasi krijohen situata dramatike siç ndodhi vjet. Bashkitë bëjnë ndarjen , duhet të garantojnë njerëzit që janë kontribuuesit e tyre. Kriteret duhet të jenë të mirë përcaktuara. Asnjë numër koshash nuk përballon dot fluksin e mbetjeve nëse nuk ka ndarje,” tha Kryeministri Edi Rama i bindur se bizneset në bregdet duhet të taksohen me shumë për pastrimin.
“Problematika me serioze nuk e krijojnë familjet, por bizneset sepse kanë një volum mbetjesh që nuk ka kazan që i mban. Zgjidhja në teori është e thjeshtë. Po të ecësh një orë në Paris është mbushur me thasë se sepse bizneset kanë një orë të caktuar ku duhet të nxjerrin thasët e zi. Nuk ka shans që një biznes të marrë thasët e vet e ti çojë tek kazani sepse aty krijohet kolapsi që shohim në qytetet tona. Bizneset duhet të paguajnë më shumë për pastrimin.”
