Bekim Jashari: Vetëm të bashkuar jetësojmë amanetin e dëshmorëve
Duke bërë thirrje që të vazhdojnë të jenë të bashkuar, Kryetari i Komunës së Skenderajt, Bekim Jashari, në përmbyllje të Epopesë së lavdishme të UÇK-së tha se vetëm kështu mund të jetësojmë amanetin e dëshmorëve tonë.
Zëri i protestës trokiste në ndërgjegjen e ndërkombëtarëve për ndërhyrje në ndaljen e gjenocidit serb në Kosovë, tha Bekim Jashari ndërsa shtoi se kënga ishte ajo që mbajti gjallë frymën tonë patriotike, shpresën për liri dhe pavarësi.
“22 vjet pas çlirimit të vendit, falënderoj të gjithë këngëtarët tonë që i kënduan UÇK-së, luftës heroike që zhvillohej nga të moshuarit e deri te fëmijët. Ata që i kënduan lirisë dhe ata që mbajtën gjallë shpresën se liria po vjen. Ju që nuk u ndalët asnjëherë në nderim të jetë dhe veprës heroike të komandantit legjendar Adem Jashari, dëshmorëve e martirëve dhe gjithë historisë sonë të lavdishme,” tha Bekim Jashari duke hapur programin artistik në përmbyllje të Epopesë së lavdishme të UÇK-së, ndërsa apeloi:
“Ju falënderoj nga zemra dhe ju bëj thirrje që të vazhdoni të jeni të bashkuar, sepse vetëm kështu mund të jetësojmë amanetin e dëshmorëve tonë. Lavdi, heronjve, dëshmorëve dhe të gjithë atyre që ranë për lirinë e vendit.”
Sonte në Natën e Zjarreve, në fjalën e rastit Ish-kryeministri i Kosovës, Ramush Haradinaj u shpreh:
“Të gjithë ata që e ndjekin koncertin e sotëm në natën përmbyllëse në Natën e Zjarreve, kam nderin t’ju drejtohem nga këtu si bashkëluftëtar dikur, të shprehim respektin për sakrificën sublime për heroizmin e familjes Jashari, për simbolin tonë qëndresës e lirisë, e sonte në Natën e Zjarreve të premtojmë që do ta mbajmë të ndezur zjarrin për liri e për bashkim kombëtar. Lavdi heronjve”, tha Haradinaj.
Ndryshe, sonte në Prekaz është ndezur flakadani për Natën e Zjarreve dhe është mbajtur një koncert në nderim të 23-vjetorit të Epopesë së lavdishme të UÇK-së, rënies së komandantit legjendar të UÇK-së Adem Jashari dhe familjes së tij në një luftë skajshmërish të pabarabartë.
Për shkak të pandemisë COVID-19, ky aktivitet është mbajtur pa praninë e publikut, duke respektuar kështu masat e institucioneve shëndetësore vendore.
