Bërnabiç: Kosova, sfida më e madhe politike
Qeveria e Serbisë do të ketë gjashtë qëllime kryesore, ku e para do të jetë ruajtja e shëndetit të qytetarëve, tha kandidatja për Kryeministre, Ana Bërnabiç duke prezantuar programin e saj para parlamentit të ri, ku kanë zënë vend, interesat e Serbisë në Kosovë, lufta kundër mafies, ruajtja e vendimmarrjes së pavarur të Serbisë, përshpejtimi i reformave dhe përparimi ekonomik i vendit.
Bërnabiç tha se qeveria e re gjithashtu përballet me sfida të mëdha politike, e mbi të gjitha me vazhdimin e dialogut me Prishtinën.
“Qeveria do të koordinojë të gjitha lëvizjet e saj me Presidentin e Serbisë, Aleksandar Vuçiç dhe me përfaqësuesit e serbëve nga Kosova, ku përparësi është uniteti kombëtar,” tha Ana Bërnabiç duke shtuar se qeveria e saj nuk do të heqë dorë nga insistimi për formimin e Asociacionit të komunave me shumicë serbe.
“Qeveria e re do të vazhdojë të ndjekë politikën e mbrojtjes së interesave jetësore kombëtare, të paqes dhe bashkëpunimit, me synimin për të mbrojtur popullin tonë, trashëgiminë kulturore, por edhe paqen dhe stabilitetin në rajon”, theksoi Bërnabiç, qëllime këto që ishin deklaruar më parë edhe nga presidenti i Serbisë dhe Kryetari i Partisë Përparimtare Serbe, Aleksandar Vuçiç.
Më pas, kandidatët për ministra do të bëjnë betimin, me çka kabineti i Ana Bërnabiçit e fillon mandatin e ri.
Ndryshe, seanca u hap nga Kryetari i Parlamentit, Ivica Daçiç, i cili përcaktoi rendin e ditës me një pikë, zgjedhjen e qeverisë dhe betimin e kryeministres dhe anëtarëve të qeverisë.
Bashkë me Partinë Përparimtare Serbe, SNS, në qeverinë e re janë përfshirë, Partia Socialiste të Serbisë, SPS e Ivica Daçiçit dhe Aleanca Patriotike Serbe, SPAS e Aleksandar Shapiç.
Në qeverinë e re do të ketë gjithashtu edhe parti të pakicave. Katër parti të pakicave kanë kaluar pragun por ende nuk është bërë e ditur se kush do të jetë pjesë e qeverisë.
Kandidatja për kryeministre, Ana Bërnabiç, tha se rreth 50 për qind e anëtarëve të qeverisë së ardhshme do të jenë gra dhe se 50 për qind do të jenë gjithashtu figura të reja. Gjashtë prej kandidatëve, raporton RFE, deri më tani nuk kishin asnjë lidhje me qeverinë ose partitë në pushtet.
