Biden pret në Washington liderët polakë

Presidenti i Shteteve të Bashkuara, Joe Biden, do të takojë sot në Shtëpinë e Bardhë, liderët polakë, presidentin Andrzej Duda, dhe kryeministrin Donald Tusk.

Ai pritet ta sigurojë aleatin e rëndësishëm të NATO-s, Varshavën, raporton RFE, se e gëzon mbështetjen e Washingtonit, pas pushtimit të Ukrainës nga Rusia.

Para vizitës në SHBA, Duda u bëri thirrje aleatëve të NATO-s për t’i rritur shpenzimet si përgjigje ndaj druajtjeve të mëdha për agresionin e Moskës.

Ai pritet t’i kërkojë Bidenit që të dërgojë më shumë trupa amerikane në krahun lindor të aleancës ushtarake me Rusinë.

Takimi i pazakontë i Bidenit me djathtistin Duda dhe proevropianin Tusk, tregon për shqetësimet e Shteteve të Bashkuara se tensionet e mëdha mes liderëve polakë mund ta dëmtojnë aleancën perëndimore.

Gjatë një fjalimi para kombit javën e kaluar, raporton RFE, Biden tha se “nëse dikush në këtë dhomë mendon se Vladimir Putin do të ndalet në Ukrainë, unë ju siguroj se ai nuk do të ndalet”.

Druajtjet për fatin e Ukrainës janë duke u rritur nëpër Evropë, pasi ajo po përballet me mungesë armatimi dhe municioni, derisa Rusia po përparon në fushëbetejë në Ukrainë, në vitin e tretë të pushtimit.