Bilanci tragjik në Haiti, 1.297 të vdekur nga tërmeti dhe mbi 5.700 të plagosur

Agjencia për Mbrojtje Civile në Haiti raporton se 1.297 persona janë konfirmuar të vdekur nga tërmeti shkatërrimtar me magnitudë 7.2 të shkallës Richter ndërsa numri i të plagosurve ka shkuar në mbi 5.700. Ndërkohë ekipet e kërkim-shpëtimit janë nisur edhe nga vendet fqinje për të ndihmuar në Haiti.

Spitalet e Haitit, raporton RFE, janë mbingarkuar nga numri i madh i të plagosurve, çka ka shtyrë autoritetet që të dërgojnë mjekët e rajoneve tjera, në zonën në afërsi ku ka ndodhur tërmeti.

Shkalla e dëmit është bërë më e qartë më 15 gusht, meqë Agjencia për Mbrojtje Civile tha e më shumë se 700 ndërtesa janë shkatërruar, duke përfshirë spitale dhe shkolla, si dhe të paktën 3.778 shtëpi janë shkatërruar, si dhe rrugët janë dëmtuar.

Dëmi më i madh është raportuar në qendër të qytetit Jeremie, në të cilin jetojnë rreth 200.000 persona.

Punëtorët ndërkombëtarë për ndihma, mjekë dhe shpëtimarë tjerë janë parë në aeroportin Port au Prince, duke pritur për t’u nisur në zonën e dëmtuar nga tërmeti.

Sfida me të cilën po përballet Haiti është përkeqësuar nga kriza politike, e cila ka nisur në këtë shtet prej vrasjes së presidentit Jovenel Moise më 7 korrik. Pandemia e koronvirusit dhe situata ekonomike, kanë ndikuar po ashtu në përshkallëzim.