Blinken: Diskutime produktive me Vuçiçin
Sekretari amerikan i Shtetit, Antony Blinken, tha se ka pasur diskutime produktive me presidentin e Serbisë, Aleksandar Vuçiç, në Munich të Gjermanisë, ku po mbahet Konferenca për sigurinë.
“Biseduam për rëndësinë e normalizimit të marrëdhënieve të Serbisë me Kosovën dhe për atë se sa e vlerësojmë mbështetjen e vazhdueshme të Serbisë për Ukrainën,” u shpreh Blinken përmes rrjetit social Twitter duke përfunduar:
Had a productive conversation with Serbian President @AVucic today at the @MunSecConf. We discussed the importance of normalized relations with Kosovo and I conveyed our appreciation for Serbia’s continued support for Ukraine. We share Serbia’s desire for a future with the EU. pic.twitter.com/9isoAics6N
— Secretary Antony Blinken (@SecBlinken) February 17, 2023
“Ne e ndajmë dëshirën e Serbisë për një të ardhme me Bashkimin Evropian.”
Vuçiç, i cili po merr pjesë në Konferencën e Sigurisë në Munich, përmes rrjetit social Instagram u shpreh se në takim me Blinkenin, përveç se u diskutua për marrëdhëniet ndërmjet Beogradit dhe Prishtinës, u konfirmua edhe përmirësimi i marrëdhënieve mes vendeve të tyre.
Ndryshe, Kosova dhe Serbia janë nën presionin e komunitetit ndërkombëtar për të arritur një marrëveshje për normalizimin e marrëdhënieve, nga frika se Rusia mund t’i shfrytëzojë tensionet mes tyre për të nxitur destabilizim në Ballkan, në përpjekje për të zhvendosur vëmendjen nga agresioni i saj në Ukrainë.
Aktualisht, raporton RFE, palët kanë në tryezë një propozim të BE-së për normalizimin e marrëdhënieve, për të cilin SHBA ka shprehur mbështetje. Bartësit e dialogut, kryeministri i Kosovës, Albin Kurti, dhe presidenti i Serbisë, Aleksandar Vuçiç, pritet të takohen në Bruksel më 27 shkurt, për herë të parë që nga nëntori i vitit të kaluar.
