Bordi i Edi Ramës ul çmimin e naftës në 203 lekë, sërish larg realitetit
Bordi Kombëtar i Administrimit të Karburanteve sërish e ka ulur çmimin e naftës, duke marrë vendim që deri më 21 Mars ai të jetë 203 lekë/litër, por krahasuar me çmimin në bursën londineze dhe tregun amerikan sërish është larg realitetit.
Kur çmimi i naftës më 1 Mars në bursë ishte 110.9 $/fuçi dhe nuk kishte Bord, nafta në vendin tonë tregtohej 192 lekë, sot kur çmimi i naftës në bursën londineze është 101.05 $/fuçi dhe tregun amerikan 97.15 $/fuçi, Bordi i Edi Ramës përcakton çmimin për tregtim 203 lekë/litër.
Ndërkohë çmimi i benzinës dhe gazit mbeten të pandryshuara deri më 21 Mars, 206 lekë/litër përkatësisht 93 lekë/litër.
Njoftimi:
Bordi i Transparencës i ngritur me vendim Qeverie, me qëllim kufizimin e përkohshëm të çmimeve të tregtimit me shumicë/pakicë, sot në datë 16 mars 2022, në mbledhjen e tij të rradhës, bazuar në metodologjinë e ndërtimit të çmimeve sipas nenit 21/5 të Aktit Normativ, ky Bord vendosi:
1.Çmimi me shumicë i nënproduktit gazoil do të jetë 199 lekë/litër, dhe nënproduktit benzinë për periudhën 16 Mars-21 Mars 2022, të jetë 193 lekë/litër
2.Çmimi i shitjes me pakicë të nënproduktit gasoil i standardit SSH EN 590 për periudhën 16 Mars-21 mars 2022, të jetë 203 lekë/litri.
3.Çmimi i shitjes me pakicë të nënproduktit benzinë e standardit SSH EN 228 për periudhën 16 Mars-21 mars 2022, të jetë 206 lekë/litri.
4.Çmimi i shitjes me pakicë të nënproduktit gaz për periudhën 16 Mars-21 mars 2022, të jetë I pandryshueshëm 93 lekë/litri.
Bordi i Transparencës do mblidhet përsëri ditën e hënë, datë 21.03.2022 me qëllim pasqyrimin në çmimin e shitjes me pakicë të këtyre nënprodukteve, të ndryshimeve të mundshme të çmimeve në tregjet ndërkombëtare.
Çdo operator i shitjes me shumicë dhe pakicë të nënprodukteve të naftës, është i detytuar të zbatojë Vendimin e Bordit të Transparencës në lidhje më çmimet e shitjes me shumicë dhe pakicë.
Organet ligjzbatuese do kontrollojnë zbatimin e vendimeve të Bordit të Transparencës çdo ditë.
Në rast të shkeljeve të konstatuara nga operatorë të ndryshëm, do të zbatohen penalitetet e përcaktuara në Aktin Nortmativ.
