Borrell: Aktet e dhunshme të papranueshme, të shtensionohet situata

Përafqësuesi i Lartë për Politikë të Jashtme dhe Siguri i Bashkimit Evropian, Josep Borrell e ka dënuar dhunën e ushtruar ndaj trupave të KFOR-it, policisë dhe mediave, derisa i ka kërkuar Kosovës dhe protestuesve në veri që ta shtensionojë menjëherë situatën atje.

“Aktet e dhunshme, të kryera ndaj trupave të KFOR-it, mediave, civilëve dhe policisë janë absolutisht të papranueshme,” tha Borrell përmes rrjetit social Twitter duke shtuar se BE u kërkon autoriteteve të Kosovës dhe protestuesve që menjëherë dhe pa kushte ta shtensionojnë situatën ndërsa përfundoi:

“Ne presim që palët të veprojnë me përgjegjësi dhe të gjejnë menjëherë një zgjidhje politike përmes dialogut!”

Ndryshe, protestat e djeshme të serbëve të udhëhequra nga strukturat kriminale në veri përveç fyerjeve dhe vandalizmit të shfaqur ndaj automjeteve të policisë dhe mediave kosovare kulmuan me përplasje me trupat e KFOR-it, ku mbetën të lënduar 25 ushtarë dhe dhjetëra protestues serbë.