Braho pret të marrë mandatin e deputetit/ Do shkoj vetëm se në Kuvend është…

Spartak Braho pritet të marrë sot mandatin e deputetit, pas largimit të ish-ministrit të Brendshëm, Sajmir Tahiri.

Tre ditë më parë u firmos procedura nga Sekretari i Përgjithshëm i Kuvendit për të zëvendësuar Saimir Tahirin, me pasuesin në listë, Spartak Brahon.

Pak orë para vendimit të KQZ-së, Braho ka treguar edhe arsyen përse ka vendosur ta marrë mandatin e deputetit.

“Po do ta pranoj mandatin. Kam që nga ‘96 që kam qenë prezent në listat e PS dhe dy legjislaturat e fundit deputet i saj. Kam patur dilema për ta pranuar por sa kohë aty qëndron Berisha s’ka arsye të mos shkoj dhe unë”, tha Braho për Top Channel.

Aktualisht, Braho është këshilltari i Kryeministrit për marrëdhëniet me Parlamentin dhe renditet i 19-ti në listën e kandidatëve të Partisë Socialiste në Qarkun e Tiranës.

Kodi Zgjedhor, neni 164 thekson se:

“Në rastin se deputeti deklaron në mënyrë publike përpara komisionit përkatës të Kuvendit refuzimin, për të bërë betimin ose heqjen dorë nga mandati. Në këtë rast, Kuvendi, jo më vonë se 30 ditë, njofton KQZ-në për krijimin e vakancës. Mandati i ndërprerë i deputetit ose i anëtarit të Këshillit të Bashkisë i kalon kandidatit vijues të listës së të njëjtës parti politike, në zonën zgjedhore përkatëse”, thekson Kodi.